އައްޑޫގައި ތަރައްގީކޮށްފައިވާ ފުލުހުންގެ ނޭޝަނަލް ކޮލެޖް އޮފް ޕޮލިސިން އެންޑް ލޯ އެންފޯސްމެންޓުގެ މަރާމާތުގެ މަސައްކަތްތަކަށް އިންޑިއާ ސަރުކާރުން 130.9 މިލިޔަން ރުފިޔާ ނުވަތަ 8.5 މިލިޔަން ޑޮލަރުގެ ހިލޭ އެހީއެއް ދެއްވުމަށް ނިންމަވާފައިވާ ކަމަށް ހޯމް މިނިސްޓަރު އަލީ އިހްސާން ވިދާޅުވެއްޖެއެވެ.
މި އެހީ ދިނުމަށް އިންޑިއާ ސަރުކާރުން ނިންމި ނިންމުމަކީ ދެ ގައުމުގެ ދެމެދުގައި އޮތް ޚާއްސަ ގުޅުން ދައްކުވައިދޭ ކަމެއް ކަމުގައި މިނިސްޓަރު ފާހަގަކުރެއްވި އެވެ. އައްޑޫ ސިޓީގައި ހުންނަ އެ ކޮލެޖުގައި ބޭއްވި ފުލުހުންގެ 37 ވަނަ އަސާސީ ތަމްރީނު ކޯހުގެ ދަސްވެނިވުމުގެ ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު ވިދާޅުވީ އިންޑިއާ ސަރުކާރުން ދެއްވި އެހީއަށް ޝުކުރު އަދާކުރައްވާ ކަމަށެވެ.
އަދި މި ރަސްމިއްޔާތުގައި އިންޑިއާގެ ނޭޝަނަލް ޕޮލިސް އެކަޑަމީގެ ޑިރެކްޓަރު އަމިތް ގާގް ބައިވެރިވެ ވަޑައިގަތުމުން އެކަމަށްވެސް ޚާއްސަ ޝުކުރެއް އަދާކުރެއްވި އެވެ. މިނިސްޓަރު އިތުރަށް ވިދާޅުވީ ހޯމް މިނިސްޓްރީގެ މަސައްކަތްތައް ކުރިއަށްދަނީ ނަތީޖާ ނެރެވޭ އަދި ރައްޔިތުންގެ ރައްކާތެރިކަން ކަށަވަރު ކުރެވޭނެ ގޮތަށް ކަމަށެވެ. އަދި ފުލުހުންގެ އަސާސީ ތަމްރީނު ފުރިހަމަކުރި އޮފިސަރުން ހަވާލުވަނީ ބޮޑު ޒިންމާއަކާ ކަމަށް ފާހަގަކުރައްވައި، އެ ޒިންމާ އަދާކުރުމުގައި ނަޒާހަތްތެރިކަމާއެކު މަސައްކަތްކުރުމަށް ގޮވާލެއްވި އެވެ.
ރޭ ބޭއްވުނު ދަސްވެނިވުމުގެ ރަސްމިއްޔާތުގައި ޖުމުލަ 171 އޮފިސަރުން ވަނީ ދަސްވެނިވެފައެވެ.
