ޤާނޫނު އަސާސީގެ ދިފާޢުގައި ރައްޔިތުން ނުނިކުމެއްޖެނަމަ ގެއްލޭނެ އެތި މާބޮޑުވެދާނެކަމަށާއ،ި ވީހާ ގިނަ މިކަންކަން ގަބޫލުކޮށް، ރާއްޖޭގައި އުފެދިފައިވާ ސިޔާސީ ޕާޓީތަކާއި މަދަނީ ޖަމިއްޔާ ތަކާއި އަދިވެސް މިކަންކަމުގެ ކަންބޮޑުވުން ހުރި އެންޖީއޯ ތަކުން މާދަމާރޭ އެމްޑީޕީން ބާއްވާ ބޮޑު ޖަލްސާގައި ބައިވެރިވުމަށް އެމްޑީޕީން ގޮވާލައިފިއެވެ.
އެމްޑީޕީގެ ޗެއާޕާސަން ފައްޔާޒު އިސްމާޢިލް މިކަމަށް ގޮވާލީ މިއަދު އެޕާޓީގެ އޮފީހުގައި ބޭއްވި ނޫސްވެރިންގެ ބައްދަލުވުމުގައެވެ.
މި ބައްދަލުވުމުގައި ވާހަކަފުޅު ދައްކަވަމުން ފައްޔާޒު ވިދާޅުވީ، ސަރުކާރުން މިހާރު ވަނީ މިނިވަން މުއައްސަސާތަކާއި މަޖިލީހުގެ މެންބަރުންގެ ބާރުތައް ކަނޑުވާލާފައި ކަމުގައެވެ. އަދި މަޖިލީހުގެ މެންބަރުންގެ ބާރު ކަނޑުވާލުމަކީ ސީދާ ރައްޔިތުންގެ ބާރު ކަނޑުވާލުން ކަމުގައިވެސް އޭނާ ވިދާޅުވިއެވެ.
އެނގިވަޑަައިގަންނަވާނެ މިއަދު އަޅުގަނޑުމެން މިކަން ދޫކޮށްލައިފިނަމަ މާދަމާ އަދި އަޅުގަނޑުމެންނަށް ގެއްލޭ އެތި ބޮޑުވެގެންދާނެ، އެހެންވީމާ ކޮންމެހެން ވެސް އަޅުގަނޑުމެންގެ މި ފެށޭ ހަރަކާތްތަކުގައި ވީހާ ގިނަ މިކަންކަން ގަބޫލުކުރާ ބޭފުޅުން ބައިވެރިވުމަށް އަޅުގަނޑު ގޮވާލަން، ހަމައެއާއެކު ދިވެހި ރާއްޖޭގައި އުފެދިފައިވާ ސިޔާސީ ޕާޓީތަކާއި މަދަނީ ޖަމިއްޔާ ތަކާއި އަދިވެސް މިކަންކަމުގެ ކަންބޮޑުވުން ހުރި އެންޖީއޯ ތަކުން އަޅުގަނޑުމެން މިޖަލްސާގައި ބައިވެރިވެ އަޑުއުފުލުމުގައި ބައިވެރިވާނެ ކަމަށް އަޅުގަނޑު އުއްމީދުކުރަން.
ފައްޔާޒު ވިދާޅުވިއެވެ.
މާދަމާ ރޭ ކާނިވާ ސަރަހައްދުގައި ބޭއްވުމަށް ހަމަޖެހިފައިވާ ޖަލްސާއަކީ މި ކަންބޮޑުވުންތައް ސަރުކާރާއި، މުއައްސަސާތަކާއި، މަޖިލީހުގެ މެންބަރުންނާއި އަދި އެންމެހައި ރައްޔިތުންނާ ހިއްސާކޮށް، އަޑުއުފުލުމަށް ބާއްވާ ޖަލްސާއެއްކަން ފައްޔާޒު ހާމަކުރެއްވިއެވެ.
އަދި މި ޖަލްސާގައި ސިޔާސީ ޕާޓީތަކާއި މަދަނީ ޖަމްޢިއްޔާތަކުން ބައިވެރިވެ، އެއްއަޑަކުން މި ކަންބޮޑުވުންތަކާ ދެކޮޅަށް އަޑުއުފުލުމަށް އޭނާ ގޮވާލެއްވިއެވެ. ފައްޔާޒު އިތުރަށް ވިދާޅުވީ މިއަދު މިކަން ދޫކޮށްލައިފިނަމަ، މާދަމާ ގެއްލިގެންދާނެ އެތި އިތުރަށް ބޮޑުވެގެންދާނެ ކަމަށެވެ.
