ސައިބާ ކްރައިމާ ގުޅޭ މުހިންމު އިސްލާހެއް މިއަދު ރައްޔިތުންގެ މަޖިލީހުން ފާސްކޮށްފަިއެވެ. އެގޮތުން ޖިނާއީ އިޖުރާއަތުގެ ގާނޫނަށް އިސްލާހު ގެނައުމުގެ ބިލެއް މަޖިލީހުން ވަނީ ފާސްކޮށްފައެވެ.
މި ބިލް ސަރުކާރުގެ ފަރާތުން މަޖިލީހަށް ހުށަހެޅުއްވީ މާފުށި ދާއިރާގެ މެންބަރު ހުސައިން ރިޒާ އާދަމެވެ. ޖަލްސާގައި ވޯޓުގައި ބައިވެރިވި 58 މެންބަރުންގެ އިއްތިފާގުން މި ބިލް ވަނީ ފާސްކުރައްވާފައެވެ.
މި އިސްލާހުގެ ދަށުން ސައިބާ ކުށްތަކުގެ ތެރޭގައި ހިމެނޭ 10 އަމަލެއް ކުށުގެ ގޮތުގައި ކަނޑައަޅާފައިވެއެވެ. މިގޮތުން ހުއްދަ ނެތި ކޮމްޕިއުޓަރު ސިސްޓަމްތަކަށް ވަނުމާއި، އިތުރު ކުށެއް ކުރުމަށް މަގުފަހިކުރުމުގެ ނިޔަތުގައި ކޮމްޕިއުޓަރުތަކަށް ވަނުމާއި، ހުއްދަ ނެތި ކޮމްޕިއުޓަރު ޑޭޓާ އިންޓަސެޕްޓް ކުރުމާއި އަދި ކޮމްޕިއުޓަރު ޑޭޓާއަށް އިންޓަފިއަރ ކުރުން ހިމެނެއެވެ.
މީގެ އިތުރުން ނަހަމަ ގޮތުގައި އިލެކްޓްރޯނިކް ޑިވައިސްތައް ބޭނުންކުރުމާއި، ސައިބާ ވަޔަލެންސްގެ އަމަލުތަކާއި، ކޮމްޕިއުޓަރާ ގުޅުންހުރި ފޯޖަރީއާއި އޮޅުވާލުމުގެ އަމަލުތަކާއި، އަދި ކޮޕީރައިޓާއި އެފަދަ އެހެނިހެން ހައްގުތަކަށް އަރައިގަތުމުގެ އަމަލުތައްވެސް ވަނީ ކުށުގެ ގޮތުގައި ކަނޑައަޅާފައެވެ.
ނަމަވެސް، ކޯޓު އަމުރެއްގެ ދަށުން ނުވަތަ ގާނޫނީ ހުއްދައެއްގެ ދަށުން، އެ ހުއްދައިގައި ބަޔާންކުރާ ގޮތުގެމަތިން ކޮމްޕިއުޓަރު ސިސްޓަމްތަކަށް، ޕްރޮގްރާމްތަކަށް، ނުވަތަ ޑޭޓާއަށް އެކްސެސްވުމަކީ ކުށެއް ނޫންކަން މި އިސްލާހުގައި ސާފުކޮށް ބަޔާންކޮށްފައިވެއެވެ.
