އަރިއަތޮޅު ދެކުނުބުރީ ކުނބުރުދޫގައި ފެނުގެ ނިޒާމް ގާއިމްކުރުމުގެ މަސައްކަތް ފުރިހަމަކޮށް ނިންމައިފިއެވެ. މޯލްޑިވްސް ވޯޓަރ އެންޑް ސުވަރޭޖް ކޮމްޕެނީގެ މެނޭޖިންގ ޑިރެކްޓަރ އަބްދުލް މަތީން މުހައްމަދު ވިދާޅުވިގޮތުގައި، މި މަޝްރޫޢު ކާމިޔާބުކަމާއެކު ނިންމާލެވިފައިވަނީ ގިނަ ބައެއްގެ މިންނެތް މަސައްކަތުން ކަމަށެވެ.
ސަރުކާރުގެ ބަޖެޓުން 45 މިލިއަން ރުފިޔާ ހޭދަކޮށްގެން ކުރިއަށްގެންދެވުނު މި މަޝްރޫޢުގެ ދަށުން، ރަށުގައި 2.75 ކިލޯމީޓަރުގެ ފެން ހޮޅީގެ މައި ނެޓްވޯކެއް ވަނީ ޤާއިމްކުރެވިފައެވެ. އަދި އާރުއޯ ފެސިލިޓީ ބިލްޑިންގ އިމާރާތްކޮށް، ފެން އުފެއްދުމަށް ދެ އާރުއޯ ޕްލާންޓް އަދި ފެން ރައްކާކުރުމަށް ތިން ތާނގީ ވަނީ ބަހައްޓާފައެވެ. މީގެއިތުރުން، ރަށުގެ ހުރިހާ ގޭބިސީތަކަށް ފެންމީޓަރު ބަހައްޓައި، ފެނުގެ ކަނެކްޝަން ގުޅައިދިނުމުގެ މަސައްކަތްވެސް ވަނީ ނިމިފައެވެ.
ހަމައެއާއެކު، މި މަޝްރޫޢުގެ ދަށުން 2.30 ކިލޯމީޓަރުގެ ނަރުދަމާގެ މައި ނެޓްވޯކަކާއި، 374 މީޓަރުގެ ޕަންޕިން ލައިނެއް ވަނީ އަޅާފައެވެ. އަދި ނަރުދަމާގެ އިދާރީ އިމާރާތަކާއި ދެ ޕަންޕިން ސްޓޭޝަން އިމާރާތްކޮށް، ގޭގޭގައި ޖަންކްޝަން ބަހައްޓައި، ނަރުދަމާގެ ކަނެކްޝަން ގުޅައިދެވިފައިވެއެވެ.
މި ނިޒާމްތައް ހިންގައި ބެލެހެއްޓުމަށްޓަކައި، އެމްޑަބްލިއުއެސްސީން ވަނީ ޖަނަރޭޓަރު ސެޓަކާއި، ވެހިކަލްއެއް އަދި ފެން ތަހުލީލުކުރުމަށް ބޭނުންވާ ސާމާނު އެ ރަށަށް ފޯރުކޮށްދީފައެވެ. މަޝްރޫޢު ނިމުމާ ގުޅިގެން، އެމްޑީ މަތީން ވަނީ މަޝްރޫޢުގައި ހިއްސާވި އެންމެހައި ފަރާތްތަކަށް ޝުކުރު އަދާކުރައްވައި، ކުނބުރުދޫ ރައްޔިތުންނަށް ތަހުނިޔާ ދަންނަވާފައެވެ.
