މަސްތުވާތަކެތީގެ ގާނޫނަށް އިސްލާހު ގެނައުމުގެ ބިލު ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާއިފިއެވެ. ގަމު ދާއިރާގެ މެންބަރު ޔޫސުފް ނަޝީދު މި ބިލު ހުށަހެޅުއްވީ މަސްތުވާތަކެތީގެ ކުށްތައް އިތުރުވަމުންދާތީ، އެކަން ހުއްޓުވުމަށް ގާނޫނު ތަންފީޒުކުރާ ފަރާތްތަކަށް އިތުރު ބާރުދިނުމަށާއި، މަސްތުވާތަކެއްޗަށް ދެވިހިފާފައިވާ މީހުންނަށް ފަރުވާދެވޭނެ ހަރުދަނާ ނިޒާމެއް ގާއިމުކުރުމަށެވެ.
މި ބިލުގައި އަލަށް ކޮންޓްރޯލްކުރަންޖެހޭ މަސްތުވާތަކެތި ހިމެނުމާއި، އިތުރު ކުށްތަކާއި އަދަބުތައް ކަނޑައެޅުމާއި، ފަރުވާގެ ނިޒާމު ހަރުދަނާކުރުމާއި، ޑްރަގް ކޯޓުގެ އުސޫލުތައް މުރާޖައާކުރުން ހިމެނެއެވެ. އަދި ކުށްކޮށްގެން ހޯދާ މުދާ ހިފެހެއްޓުމާއި ދައުލަތަށް ނެގުމުގެ އުސޫލުތައްވެސް މުރާޖައާކުރުމަށް ހުށަހަޅާފައިވެއެވެ.
ނޮވެމްބަރު 26 ވަނަ ދުވަހު ރައީސް މުއިއްޒު ވިދާޅުވެފައިވަނީ މިހާރުގެ ގާނޫނުގައި ހުރި އުނިކަންތައްތަކަކީ މަސްތުވާތަކެއްޗާ ދެކޮޅަށް ކުރާ މަސައްކަތަށް އޮތް އެންމެ ބޮޑު އެއް ގޮންޖެހުން ކަމަށެވެ. މި ބިލުގެ ފުރަތަމަ ކިޔުން އިއްވައި މަޖިލީހުގެ ޖަލްސާއަށް ވަނީ އެޖެންޑާކޮށްފައެވެ.
