މި ޑިސެންބަރު މަހުގެ އުމްރާ ދަތުރުގައި ޓްރެކިން ޑިވައިސް ބޭނުންކުރުމަށް ހަމަޖެހިފައިވާ ކަމަށް މޯލްޑިވްސް ޙައްޖު ކޯޕަރޭޝަނުން ބުނެފިއެވެ.
މޯލްޑިވްސް ޙައްޖު ކޯޕަރޭޝަނުގެ ޑެޕިއުޓީ މެނޭޖިންގ ޑިރެކްޓަރ އަލީ ޝަރީފް ވިދާޅުވެފައިވަނީ މި ޑިސެންބަރު މަހުގެ އުމްރާ ދަތުރުގައި ޓްރެކިން ޑިވައިސް ބޭނުންކުރުމަށް ހަމަޖެހިފައިވާ ކަމަށާއި، މިއީ އުމްރާ ދަތުރެއްގައި މި ޑިވައިސް ބޭނުންކުރާ ފުރަތަމަ ފަހަރު ކަމުގައެވެ. ޙައްޖު ކޯޕަރޭޝަނުން ވަނީ މި އަހަރުގެ ޙައްޖުގައި މި ޓެކްނޮލޮޖީ ކާމިޔާބުކަމާއެކު ބޭނުންކޮށްފައެވެ.
ޕީއެސްއެމްގެ ޕްރޮގްރާމެއްގައި ވާހަކަފުޅު ދައްކަވަމުން އަލީ ޝަރީފް ފާހަގަކުރެއްވި ގޮތުގައި މީގެ ކުރިން ޙައްޖާއި އުމްރާގައި މީހުން ގެއްލިގެން ގިނަ ވަގުތުތަކެއް ހޭދަވުމުގެ ސަބަބުން ނަފްސާނީ ގޮތުން ބަލިވުން ފަދަ މައްސަލަތައް ދިމާވެފައިވެއެވެ. ނަމަވެސް ވޭތުވެދިޔަ ޙައްޖުގައި ޓްރެކިން ޑިވައިސް ބޭނުންކުރުމުން، ގެއްލޭ މީހުން ވަރަށް އަވަހަށް ހޯދައި ގެނެވުނު ކަމަށް އޭނާ ވިދާޅުވިއެވެ.
މި ޑިސެންބަރު މަހުގެ އުމްރާ ދަތުރަކީ ޙައްޖު ކޯޕަރޭޝަނުގެ ހަވާލުގައި މިހާތަނަށް އެންމެ ގިނަ އަދަދެއްގެ މީހުން ބައިވެރިވާ އުމްރާ ދަތުރު ކަމަށްވާއިރު، މި ދަތުރުގައި 800 އެއްހާ މީހުން ބައިވެރިވާނެއެވެ. މި ގިނަ އަދަދުގެ މީހުން ބެލެހެއްޓުމަށްޓަކައި ކޮންމެ މީހަކަށް ޓްރެކިން ޓެގެއް އެޅުވުމަށް ނިންމާފައިވާ ކަމަށް އަލީ ޝަރީފް ވިދާޅުވިއެވެ.
ޙައްޖާއި އުމްރާގެ އަޅުކަމަކީ ވަރަށް ގިނަ އަދަދެއްގެ މީހުން އެއްތަނަކަށް ޖަމާވާ އަޅުކަމަކަށްވުމާއެކު، މީހުން ގެއްލި މަގުއޮޅުމަކީ އާންމުކޮށް ދިމާވާ ކަމެކެވެ. މިފަދަ ހާލަތްތަކުގައި ދިވެހިން ވެސް ގެއްލިގެން އިޢުލާންކުރަން ޖެހިފައިވާކަން ފާހަގަކުރެވެއެވެ.
