މިފްކޯއިން މިއަދު ކޫއްޑޫއާއި އައްޑޫ ފިޝަރީސް ކޮމްޕްލެކްސްއަށް 22،922،141 ރުފިޔާ ދޫކޮށްފިއެވެ. މި ފައިސާއަކީ މިދިޔަ މަހުގެ 28 ވަނަ ދުވަހުން މި މަހުގެ 15 ވަނަ ދުވަހުގެ ނިޔަލަށް ކިރާފައިވާ މަހަށްވާ ފައިސާއެވެ. އަދި މިފްކޯއިން މައުލޫމާތު ދެއްވާފައިވާ ގޮތުގައި، މި އަދަދަކީ 28 މިލިއަން ރުފިޔާއިން ޑީސަލަށްވާ 5،786،266 ރުފިޔާ ކެނޑުމަށްފަހު ދޫކުރެވުނު މިންވަރެވެ.
މިފްކޯއިން އެންމެ ފަހުން މަސްވެރިންނަށް ފައިސާ ދެއްކީ މިދިޔަ އޮކްޓޫބަރު 31 ވަނަ ދުވަހުއެވެ. އޭރު 27 ސެޕްޓެންބަރުން 27 އޮކްޓޫބަރުގެ ނިޔަލަށް މަސްވެރިން މިފްކޯއަށް ކިރާފައިވާ މަހަށް 15 މިލިއަން ރުފިޔާ ދޫކުރިއެވެ. ނަމަވެސް މިފަހަރު ފައިސާ ދޫކުރިއިރު، ފެލިވަރު ފިޝަރީސް ކޮމްޕްލެކްސްއަށް ކިރާފައިވާ މަހަށް ފައިސާ ދެވިފައިނުވާ ކަމަށާއި، އެންމެ އަވަހަށް ދެން ދޫކުރާނީ މި ފައިސާ ކަމަށް މިފްކޯއިން ބުނެފައިވެއެވެ.
މިފްކޯގެ ހިސާބުތަކުން ދައްކާގޮތުގައި މިހާތަނަށް 918 މިލިއަނަށްވުރެ ގިނަ ރުފިޔާ މަސްވެރިންނަށް ދީފައިވާއިރު، މިވަގުތު މަސްވެރިންނަށް ނުދައްކާ ހުރީ 30،482،931 ރުފިޔާއެވެ. ފާހަގަކޮށްލެވޭ ގޮތުގައި މަސްވެރިންނަށް ދޭންޖެހޭ ފައިސާ ދިނުން ލަސްވުމާ ގުޅިގެން، މަސްވެރިން އެތައް ފަހަރަކު އެކަމުގެ ކަންބޮޑުވުން ފާޅުކޮށް، ސުލްހަވެރި އެއްވުންތަކާއި މުޒާހަރާތައް ބާއްވާފައިވެއެވެ.
