ބ. އޭދަފުށީގައި 1،000 ފްލެޓު އަޅަން ޗައިނާގެ ކުންފުންޏަކާ މިއަދު ހަވާލުކޮށްފިއެވެ.
މި މަޝްރޫއުގެ ދަށުން 15 ބުރީގެ 12 ޓަވަރު އަޅާއިރު، ދެ ކޮޓަރީގެ 672 ފްލެޓް އަދި ތިން ކޮޓަރީގެ 336 ފްލެޓް އަޅާނެއެވެ. ރައީސް އޮފީހުގައި ބޭއްވި ރަސްމިއްޔާތެއްގައި އެ މަޝްރޫއު ހަވާލުކުރީ ޗައިނާގެ ސީނޯ ހައިޑްރޯ ކުންފުންޏާއެވެ. މި އެއްބަސްވުމުގައި ކޮންސްޓްރަކްޝަން މިނިސްޓްރީގެ ފަރާތުން ސޮއިކުރެއްވީ މިނިސްޓަރު ޑރ. އަބްދުﷲ މުއްތަލިބެވެ.
ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބު ވިދާޅުވީ އޭދަފުއްޓަކީ، ރާއްޖޭގައި ތަރައްގީކުރާ އާބަން ސެންޓަރުތަކުގެ ތެރެއިން ތަރައްގީގެ ނާރެހަކަށް ވެގެންދާނެ ރަށެއް ކަމަށެވެ. ޓޫރިޒަމް ދާއިރާގައި މަސައްކަތްކުރާ ފަރާތްތަކަށް އެ މީހުން ދިރިއުޅޭ ސަރަހައްދުން ބޯހިޔާވަހިކަން ފޯރުކޮށްދިނުމުގެ ފުރުސަތު ދިނުމަށް އޭދަފުއްޓަކީ ރަނގަޅު ރަށެއް ކަމަށް ވެސް މުއްތަލިބް ވިދާޅުވިއެވެ.
މުއްތަލިބު ވިދާޅުވީ އަންނަ އަހަރު އެ މަޝްރޫއުއަށް ފައިނޭންސް ހަމަޖެހި، މަސައްކަތް ފެށޭނެ ކަމަށް އުއްމީދު ކުރައްވާ ކަމަށެވެ.އަދި ކުރިއަށް އޮތް ހަތަރު އަހަރުގެ ތެރޭގައި އެ މަސައްކަތް ނިންމައި އެ ތަނަށް ވަދެވޭ ވަރުވާނެ ކަމަށް ވެސް މުއްތަލިބް ވިދާޅުވިއެވެ.
ސަރުކާރުން ރާއްޖޭގެ އެކި ކަންކޮޅުތަކުގައި އެޅުމަށް ކަނޑައަޅާފައިވާ 40،000 ހައުސިން ޔުނިޓުގެ މަޝްރޫޢުގެ ތެރެއިން އެންމެ އިސްކަންދޭ އެއް ރަށަކީ އޭދުފުއްޓެވެ. އެ ރަށުގައި 1،000 ހައުސިން ޔުނިޓް ނުވަތަ ފްލެޓު އެޅުމަކީ ރައީސް ޑރ. މުއިއްޒުގެ ރިޔާސީ ވައުދުފުޅެކެވެ.
