ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވި ފަހުން ފާއިތުވެދިޔަ 52 ހަފްތާގެ ތެރޭގައި ރާއްޖޭގެ ތަރައްޤީއާއި އާންމު ރައްޔިތުންގެ ދިރިއުޅުމަށް ފާހަގަކޮށްލެވޭ ހެޔޮ ބަދަލުތަކެއް އައިސްފައިވާކަން އެންވައިރަންމަންޓް މިނިސްޓަރ ތާރިގް އިބުރާހިމް ވިދާޅުވެއްޖެއެވެ.
ތާރިގް އެކްސްގައި ހިއްސާކުރެއްވި ޕޯސްޓެއްގައި ވިދާޅުވީ ވޭތުވެދިޔަ އަހަރުތަކުގައި އިހުމާލުވެފައިވާ ކަންކަން އިސްލާހުކުރުމަށް މި ސަރުކާރުން ގެންނަމުންދާ ބަދަލުތަކުގެ ތެރެއިން، މޫސުމީ ބަދަލުތަކާއި ތިމާވެއްޓާއި ހަކަތައާބެހޭ ވުޒާރާއިން ވޭތުވެދިޔަ 52 ހަފްތާގައި ރައީސްގެ އިރުޝާދާއި ލަފާފުޅުގެ ދަށުން ވަރަށް ގިނަ މަސައްކަތްތަކެއް ކުރެވި، އޭގެ ނަތީޖާވެސް ފެންނަމުންދާކަމުގައެވެ.
މިނިސްޓްރީން ނޮވެންބަރު މަހުގެ ނިޔަލަށް ކުރައްވާފައިވާ މަސައްކަތްތައް ރައްޔިތުންނާ ހިއްސާކުރައްވާނެކަމަށް ވިދާޅުވަމުން، މި ކާމިޔާބީތަކުގެ ފަހަތުގައިވާ މިނިސްޓްރީގެ މުވައްޒަފުންގެ މިންނެތް މަސައްކަތާއި މިނިސްޓްރީއަށް ލިބުނު އެއްބާރުލުން ވަޒީރު ވަނީ ފާހަގަކުރައްވާފައެވެ.
ސަރުކާރަށް އަހަރެއް ފުރިގެންދާއިރު، އެންވަޔަރަންމަންޓް މިނިސްޓްރީން ވަނީ ހަކަތައާއި، ކުނި މެނޭޖްކުރުމާއި، ފެނާއި ނަރުދަމާގެ މުހިންމު މަޝްރޫޢުތަކެއް ކުރިއަށް ގެންގޮސް، އޭގެތެރެއިން ބައެއް މަޝްރޫޢުތައް ނިންމާލެވިފައެވެ. އަދި އިތުރު މުހިންމު މަޝްރޫޢުތަކެއްގެ މަސައްކަތްތައް ފެށިފައިވާކަން ފާހަގަކުރެވެއެވެ.
