ވެރިކަން ކުރާ މައި ޕާޓީ، ޕީއެންސީއަށް މެމްބަރުން އިތުރު ކުރުމުގެ ބޮޑު ހަރަކާތެއް މާދަމާ މާލެ ސަރަހައްދުގައި ބާއްވާ ގޮތަށް ހަމަޖެހިއްޖެއެވެ.
ޕީއެންސީން ބުނި ގޮތުގައި މި ހަރަކާތް އޮންނާނީ މާދަމާ ހެނދުނު 10:30 ފެށިގެން ހޯމަ ދުވަހުގެރޭ 22:30 ގެ ނިޔަލަށެވެ.
ހަރަކާތް ފެށިގެން ދާނީ މާދަމާ ހެނދުނު ކޮންގްރެސް ހައުސް (ހެންވޭރު އާޓިފިޝަލް ބީޗް ކުރިމަތި) އިންނެވެ.
"މިހަރަކާތުގައި ބައިވެރިވެ ވަޑައިގެން ދެއްވުމަށް އެދި ކޮންގްރެސް ޕާޓީގެ އެންމެހާ ލޮބުވެތި މެންބަރުންނަށް ދަޢުވަތު އަރުވަން." ޕީއެންސީން ދައުވަތު ދީފައިވެއެވެ.
ރައީސް އަދި ޕީއެންސީގެ ރައީސް ޑރ. މުހައްމަދު މުއިއްޒު ވަނީ ޕީއެންސީއަށް މެމްބަރުން އިތުރު ކުރުމުގެ ބޮޑު ހަރަކާތެއް ފައްޓަވައިފައެވެ. މި ހަރަކާތުގެ ތެރެއިން މިހާތަނަށް އައިއިރު، ޕީއެންސީއަށް ވަނީ 60،000 އަށް ވުރެ ގިނަ މެމްބަރުން ގުޅިފައެވެ.
ރައީސް އިރުޝާދު ދެއްވާފައި ވަނީ ނޮވެމްބަރު 17 ގެ ކުރިން ޕީއެންސީގެ މެމްބަރުންގެ އަދަދު 75،000 އަށް އެރުވުމަށެވެ.
