ވެލާނާ އިންޓަރނޭޝަނަލް އެއަރޕޯޓްގެ އައު ފިއުލް ފާމާއި ފިއުލް ހައިޑްރަންޓް ނިޒާމުގެ ޚިދުމަތް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު އިފްތިތާޙުކޮށްދެއްވައިފިއެވެ.
މިކަމަށް ބޭއްވުނު ޚާއްސަ ރަސްމިއްޔާތުގައި ރައީސް މުޢިއްޒުގެ އިތުރުން ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަތީފް އާއި، ސަރުކާރުގެ އިސްވެރިންނާއި، އެމްއޭސީއެލްގެ އިސްވެރިންނާއި އެއަރލައިންތަކުގެ ފަރާތްތައް ބައިވެރިވެވަޑައިގެންނެވިއެވެ.
އެމްއޭސީއެލްގެ ސީއީއޯ އަދި މެނޭޖިން ޑިރެކްޓަރ އިބްރާހިމް ޝަރީފް މުޙައްމަދު ވިދާޅުވި ގޮތުގައި ކުރިން ބޭނުންކުރަމުން އައި ފިއުލް ފާމަކީ 13 މިލިއަން ލީޓަރުގެ ތެޔޮ ރައްކާކުރެވޭ ފާމެއް ނަމަވެސް، އަލަށް ތަރައްޤީކޮށްފައިވާ ފިއުލް ފާމުގައި 45 މިލިއަން ލީޓަރުގެ ޖެޓް ފިއުލްގެ އިތުރުން 1 މިލިއަން ލީޓަރުގެ ޑީސަލާއި 100،000 ލީޓަރުގެ ޕެޓްރޯލް ރައްކާކުރެވޭނެއެވެ.
މީގެއިތުރުން، އަލަށް ޤާއިމުކުރެވުނު ފިއުލް ހައިޑްރަންޓް ނެޓްވޯކްގެ ސަބަބުން ފްލައިޓްތަކަށް ތެޔޮ އެޅުމަށް ހޭދަވާ ވަގުތު ވަރަށް ބޮޑަށް ކުޑަކުރެވޭނެކަމަށް ޝަރީފް ވިދާޅުވިއެވެ. 8.4 ކިލޯމީޓަރުގެ ވިއުގައެއް އަޅައި، މި ނިޒާމުގެ ތެރެއިން އެއްފަހަރާ 7 ބޯޓަށް ތެޔޮ އެޅުމުގެ ޚިދުމަތް ދެވޭނެކަމަށް އެމްއޭސީއެލްއިން ފާހަގަކުރެއްވިއެވެ. ކުރިން 60 ހާސް ލީޓަރުގެ 2 ބައުޒަރު ބޭނުންކޮށްގެން ބޮޑެތި ބޯޓުފަހަރަށް ތެޔޮ އެޅުމަށް 1 ގަޑިއިރާއި 30 މިނެޓު ހޭދަވަމުން ދިޔަ ނަމަވެސް، މި އައު ނިޒާމާއެކު 45 މިނެޓު ސަލާމަތްކުރެވޭނެކަމަށް ޝަރީފް ވިދާޅުވިއެވެ.
