މި އަހަރުގެ ނޫސްވެރިކަމުގެ އިނާމު ދިނުމުގައި އުސޫލާ ޚިލާފު އެއްވެސް ކަމެއް ހިނގާފައިނުވާ ކަމަށް މޯލްޑިވްސް މީޑިއާ ކައުންސިލުން އިއްޔެ ނެރުނު ބަޔާނެއްގައި ބުނެފިއެވެ.
އެގޮތުން އޯޑިއޯ/ވީޑިއޯ ކެޓަގަރީގެ ތަހުގީގީ ދާއިރާއިން "އަދަދު" އޮންލައިންގެ "ސްކީލާން" ޑޮކިއުމެންޓްރީއަށް އެވޯޑް ދިނީ އުސޫލާ ހިލާފަށް ކަމަށް ބުނެ ފަނޑިޔާރުންގެ ޕެނަލުންނާއި ކައުންސިލްގެ ރައީސް އަހުމަދު މުސްތަފާ ނެރުނު ބަޔާނުގައި ކޮށްފައިވާ ތުހުމަތުތަކަކީ ހަގީގަތާ ޚިލާފު ބޮޑެތި ތުހުމަތުތަކެއް ކަމުގައި އެމްއެމްސީން ވަނީ ބުނެފައެވެ.
އޯޑިއޯ ވީޑިއޯ ކެޓަގަރީން ތަހުގީގީ ނޫސްވެރިކަމުގެ ދާއިރާގެ ރުބްރިކްގައި ތަހުގީގީ ނަޒަރަކުން އެ އުފެއްދުމަށް އިންސާފުކުރަން ހަނިކޮށްފައިވާ ކަމަށް ފަނޑިޔާރުން ނެރެފައިވާ ކަމަށް ބުނާ ލިޔުމުގައި ފާހަގަކޮށްފައިވާއިރު، އެފަދަ ކަންބޮޑުވުމެއް ފަނޑިޔާރުންގެ ފަރާތުން ކައުންސިލާ ހިއްސާކޮށްފައެއްނުވޭ.
އެމްއެމްސީގެ ބަޔާނުގައިވެ އެވެ.
ކައުންސިލުން ބުނެފައިވާ ގޮތުގައި އިނާމު ދިނުމުގެ ހަފްލާގައި އެވޯޑްތައް ހަވާލުކުރުމާ ހަމައަށް ފަނޑިޔާރުންގެ ފަރާތުން އެއްވެސް ކަންބޮޑުވުމެއް އަދި ޝަކުވާއެއް ކައުންސިލަށް ހުށަހަޅާފައި ނުވާއިރު، ކުރިން ސްކީލާން ޑޮކިއުމެންޓްރީއާމެދު ކައުންސިލުން ނެރުނު ބަޔާނަކީ ރިޔާސީ އިންތިހާބުގެ ތެރޭގައި ކެންޑިޑޭޓުންނަށް އަމާޒުކޮށް ބައެއް މީޑިއާތަކުން ނޫސްވެރިކަމުގެ މިންގަނޑުތަކާ ޚިލާފު ކޮންޓެންޓް ޝާއިއުކުރާ ކަމަށް ލިބުނު ޝަކުވާތަކާ ގުޅިގެން ނެރުނު ބަޔާނެއް ކަމަށް ކައުންސިލުން ވަނީ ބުނެފައެވެ.
އިނާމުގެ ކަންކަން އިންސާފުވެރިކަމާއެކު ގެންދިއުމަށް އޮޑިޓް ފާމެއް ހަމަޖެއްސުމަށް ބޭނުންވިނަމަވެސް، ބަޖެޓުގެ ދަތިކަމާހުރެ އެކަން ވަނީ ނުވެފައެވެ. މި މައްސަލައާ ގުޅިގެން އެންޓި ކޮރަޕްޝަން ކޮމިޝަނުން ވެސް އިއްޔެ ވަނީ ކައުންސިލަށް ވަދެ، އެވޯޑާ ގުޅޭ ލިޔުންތައް ގެންގޮސްފައެވެ.
