ޕީޕީއެމްގެ އެންމެ އިސް މަގާމުގައި ކުރީގެ ރައީސް އަބްދުﷲ ޔާމީން ހުންނެވިއިރު، އެ ޕާޓީގެ ބަޖެޓުގެ 90 އިންސައްތަ ވަގަށް ނަގާފައިވާ ކަމަށް މަޖިލީހުގެ މެޖޯރިޓީ ލީޑަރު އަދި އިނގުރައިދޫ ދާއިރާގެ މެމްބަރު އިބްރާހިމް ފަލާޙް ތުހުމަތުކުރައްވައިފިއެވެ.
ދިއްދޫ ދާއިރާގެ މެމްބަރު އަބްދުއްލަތީފް މުޙައްމަދު ހުށަހެޅުއްވި ސިޔާސީ ޕާޓީގެ ޤާނޫނަށް އިސްލާހު ގެނައުމުގެ ބިލަށް ބަހުސްކުރުމުގެ ތެރެއިން ފަލާޙް ވިދާޅުވީ، ދައުލަތުގެ ބަޖެޓުން ސިޔާސީ ޕާޓީތަކަށް ދޫކުރެވޭ ފައިސާ ބޭނުންކުރެވެންޖެހޭނީ އެ ޕާޓީއަކަށާއި، ރައްޔިތުންނަށާއި ދިވެހި ގައުމަށް އެންމެ ފައިދާކުރާނެ ގޮތަކަށް ކަމަށެވެ.
ޕީޕީއެމްއާ ގުޅިވަޑައިގެންނެވިއިރު، އެންމެ މެމްބަރުން ގިނަ އެއް ޕާޓީއަށްވުމުން ދައުލަތުން އެ ޕާޓީއަށް ބޮޑު އަދަދެއްގެ ފައިސާ ލިބޭކަން ފާހަގަކުރެއްވި ފަލާޙް ވިދާޅުވީ، ދައުލަތުގެ ބަޖެޓުން ޕާޓީއަށް ލިބޭ ފައިސާއަށް ވީގޮތް އަބަދުވެސް ހިތަށް އަރާ ކަމަށެވެ. އަދި ކުރިން ރައީސް ޔާމީންގެ ދިފާއުގައި ތެދުވެވަޑައިގަތް ނަމަވެސް، ހަގީގަތް އެނގުމުން އެގޮތަށް ނުހުންނަވާނެކަން ފާހަގަކުރައްވައި، ފަލާހު ރައީސް ޔާމީނަށް ވަރަށް ބޮޑަށް ފާޑުކިޔުން އަމާޒުކުރައްވާވާފައި ވެއެވެ.
ޕީޕީއެމްއަށް ދައުލަތުންނާއި އެކިއެކި ވިޔަފާރިވެރިންގެ ފަރާތުން ލިބުނު ފައިސާއަށް ވީގޮތް ސާފުވެގެން ދިޔައީ މީގެ އަހަރެއްހައި ދުވަސްކުރިން ކަމަށް ފަލާޙް ވިދާޅުވެފައިވެއެވެ. ފަލާޙް ވަނީ މި ފައިސާގެ ބޮޑު އިންސައްތައަކަށް ރައީސް ޔާމީން ހިޔާނާތްތެރިވި ކަމަށް ތުހުމަތުކުރައްވައިފައެވެ.
ރައީސް ޔާމީނަކީ ހަގީގަތުގައި އަޅުގަނޑުމެންގެ ޕީޕީއެމަށް ވެސް ޕީއެންސީއަށް ވެސް އޭރު ދައުލަތުގެ ބަޖެޓުން ލިބުނު ފައިސާގެ 90 ޕަސެންޓު އެމަނިކުފާނު ނަގައިގެން ވަގަށް ކައިފަވީ އިއްޒަތްތެރި ރައީސް. މިވާހަކަ ދައްކަން މި ޖެހެނީ ތޯތޯ، މީހަކު ބުނި ވާހަކައެއް އަޑުއަހައިގެން، އެއްގޮތަކަށް ވެސް ހީވާ ހީވުމަކަށް ދައްކާ ވާހަކައެއް ނޫން އިއްޒަތްތެރި ރައީސް.
ފަލާހު ވިދާޅުވެފައި ވެއެވެ.
ސިޔާސީ ޕާޓީތަކަށް ދައުލަތުގެ ބަޖެޓުންދޭ ފައިސާއަކީ ޓެކްސްގެ ގޮތުގައި އަދި އެހެނިހެން ގޮތްގޮތުން ރައްޔިތުން އަތުންދޭ ފައިސާއަށް ވުމާއެކު، އެއީ ސިޔާސީ ޕާޓީތަކުގެ އަމިއްލަ މަސައްކަތުން ދައުލަތަށް ހޯދައިދީފައިވާ ފައިސާއެއް ނޫންކަން ފަލާޙް ފާހަގަކުރައްވައިފިއެވެ.
މިހާރު އިލެކްޝަންސް ކޮމިޝަނުގެ ދަފްތަރުގައި 10 ސިޔާސީ ޕާޓީ ރަޖިސްޓްރީކޮށްފައިވާއިރު، މަޖިލީހުގައި ރައްޔިތުން ތަމްސީލުކުރަނީ ފަސް ޕާޓީއަކުންނެވެ. އެއީ މަޖިލީހުގެ ސުޕަރ މެޖޯރިޓީ އޮތް ޕީއެންސީއާއި، އިދިކޮޅު މައި ޕާޓީ އެމްޑީޕީގެ އިތުރުން، ޖުމްހޫރީ ޕާޓީއާއި އެމްޑީއޭ އަދި އެމްއެންޕީއެވެ. އަދި މަޖިލީހުގައި ވަކި ޕާޓީއަކަށް ނިސްބަތްވެވަޑައިނުގަންނަވާ ދެ މެމްބަރަކު ވެސް ތިއްބެވެއެވެ.
ފަލާޙް ވިދާޅުވެފައިވާ ގޮތުގައި، އަހަރު ދުވަސް ހަމަވާއިރު 3000 މެމްބަރުންގެ އަދަދު ފަހަނައަޅައި ނުދާނަމަ އެއީ ހަގީގަތުގައި ސިޔާސީ ޕާޓީއެއް ނޫނެވެ. ނިމިދިޔަ އިންތިޚާބުތަކުގައި ރައީސް ޔާމީނުގެ ޕީއެންއެފަށް ވަރަށް ބޮޑު ތާއީދެއް އޮތްކަމަށް ވާހަކަތައް ދެކެވުނު ނަމަވެސް، އެ ހުރިހާ އިންތިޚާބެއްގައި ވާދަކޮށްގެން އެންމެ އިންތިޚާބެއްގައި ވެސް އެ ޕާޓީއަށް އެއްވެސް ކާމިޔާބީއެއް ލިބިފައިނުވާ ކަމަށް ވެސް ފަލާޙް ވިދާޅުވެފައިވެއެވެ. އަދި ރައީސް ޔާމީންގެ ޕީއެންއެފްގައި ސައްހަ 3000 މެމްބަރުން ނުތިބޭނެކަން ޔަގީން ކަމަށް ފަލާޙް ވިދާޅުވެފައިވެއެވެ.
