ޓެކްސް އެޕީލް ޓްރައިބިއުނަލްގެ ރައީސްގެ މަގާމަށް، ސުޕްރީމް ކޯޓުގެ ކުރީގެ ފަނޑިޔާރު އަބްދުލްޣަނީ މުހައްމަދު އިންތިހާބުކޮށްފިއެވެ.
ޓެކްސް އެޕީލް ޓްރައިބިއުނަލްގެ ހަތަރު މަގާމަކަށް ކުރިމަތިލުމަށް އާންމުކޮށް އިއުލާން ކުރުމުން 13 ބޭފުޅުން ވަނީ ކުރިމަތިލައްވައިފައެވެ. އޭގެތެރެއިން ހަތަރު ބޭފުޅަކަށް ރައްޔިތުންގެ މަޖިލީހުން ރުހުން ދިނުމުން، ރައީސް ޑރ. މުހައްމަދު މުއިއްޒު މިދިޔަ ހަފުތާގައިވަނީ އެ ބޭފުޅުން އެ މަގާމަށް އައްޔަން ކުރައްވައިފައެވެ.
ޓެކްސް އެޕީލް ޓްރައިބިއުނަލަށް އައްޔަން ކުރެއްވީ ޣަނީގެ އިތުރުން ގ. މާވަރުލު، ހަސަން ޒުހެއިރު މުހައްމަދާއި ގ. އަލިޝާ، އިބްރާހިމް ޝަރީފާއި ގއ. ނިލަންދޫ، ޝިފްޒާ އަބްދުލްގައްޔޫމެވެ.
ޓްރައިބިއުނަލްގައި ރައީސް ކަމަށް ކުރިމަތިލެއްވި ބޭފުޅުންގެ ތެރެއިން އެ މަގާމަށް ހޮވިވަޑައިގެންނެވީ އަބްދުލްޣަނީއެވެ. ނައިބު ރައީސްގެ މަގާމަށް އިންތިހާބުވެ ވަޑައިގަތީ ޒުހެއިރެވެ.
ޓެކްސް ޓްރައިބިއުނަލްގެ ރައީސްގެ މަގާމަށާއި ނައިބު ރައީސްގެ މަގާމަށް ބޭފުޅުން އައްޔަން ކުރަނީ މެމްބަރުންގެ މެދުގައި ނަގާ ވޯޓުންނެވެ.
ޣަނީ ވަނީ ސުޕްރީމް ކޯޓުގެ އިތުރުން ހައި ކޯޓުގެ ފަނޑިޔާރުކަން ވެސް ކުރައްވައިފައެވެ.
ޓެކްސް އެޕީލް ޓްރައިބިއުނަލުން ހަތަރު މަގާމެއް ހުސްވީ އެ ބޭފުޅުންގެ މައްސަލަތަކެއް ބެލުމަށް ފަހު މަގާމުން ވަކިކުރުމުންނެވެ.
