ޑިފެންސް މިނިސްޓަރު ޣައްސާން މައުމޫން މަޖިލީހަށް ހާޒިރުކުރުމަށް ރައްޔިތުންގެ މަޖިލީހުން ނިންމާއިފިއެވެ. މި ނިންމުން ނިންމީ އިދިކޮޅު އެމްޑީޕީގެ މެންބަރު، ގަލޮޅު ދެކުނު ދާއިރާގެ މީކާއިލް އަހްމަދު ނަސީމް ހުށަހެޅުއްވި ހުށަހެޅުއްވުމަކަށެވެ. މީކާއިލްގެ މައިގަނޑު ސުވާލަކީ ރާއްޖޭގެ އިގްތިސާދީ ސަރަހައްދު ބެލެހެއްޓުމަށް ގެނެވުނު ޑްރޯންތައް ބޭނުންކުރެވެމުންދާ މިންވަރާއި، އެ ޑްރޯންތައް މިހާތަނަށް ބޭނުންކޮށްފައިވާ ގޮތްތަކާ ބެހޭ މައުލޫމާތު ހޯދުމެވެ.
މި ޑްރޯންތައް ރާއްޖެއަށް ގެނެވުނީ ރައީސް ޑރ. މުހައްމަދު މުއިއްޒު ތުރުކީއަށް ކުރެއްވި ރަސްމީ ދަތުރުފުޅަކަށްފަހުގައެވެ. އެމްޑީއެފްގައި އަލަށް ވައިގެ ބާރެއް އުފައްދައި، މިދިޔަ މާޗް މަހު ވަނީ މި ޑްރޯންތައް ރަސްމީކޮށް ބޭނުންކުރަން ފަށާފައެވެ.
ސަރުކާރުން 570 މިލިއަން ރުފިޔާ ހޭދަކޮށްގެން ގެނެސްފައިވަނީ "ބައިރަކްތާރު ޓީބީ2″ ބްރޭންޑްގެ ތިން ޑްރޯނެވެ.
އަދި އިތުރު ޑްރޯންތަކެއް ގެނައުމަށްވެސް ވަނީ ނިންމާފައެވެ. ސަރުކާރުން މައުލޫމާތު ދީފައިވާ ގޮތުގައި މިއީ އިންޓެލިޖެންސް އަދި ސަވައިލެންސް އޮޕަރޭޝަންތައް ކުރިއަށް ގެންދިއުމުގެ ޤާބިލުކަން ލިބިފައިވާ ޑްރޯންތަކެކެވެ. އެހެންނަމަވެސް އިދިކޮޅު ފަރާތްތަކުން ބުނަމުންދަނީ އިގްތިސާދީ ގޮތުން ގައުމު އިނދަޖެހިފައި ވަނިކޮށް މިއީ ދައުލަތުގެ މާލިއްޔަތުން ކޮށްފައިވާ ބޭކާރު ޚަރަދެއް ކަމުގައެވެ.
