އަންނަ އަހަރުގެ ފުރަތަމަ ދައުރުގައި އެސެޓް ރިކަވަރީ ބިލް މަޖިލީހަށް ހުށަހަޅުއްވާނެ ކަމަށް ބަންޑާރަނައިބު އަހްމަދު އުޝާމް ވިދާޅުވެއްޖެއެވެ.
މިކަން ހާމަކުރެއްވީ، ރައީސުލްޖުމްހޫރިއްޔާގެ އޮފީހުގައި ބޭއްވުނު ނޫސްވެރިންގެ ބައްދަލުވުމެއްގައެވެ. މިއަހަރުގެ މެއި މަހު އެންޓި-ކޮރަޕްޝަން ކޮމިޝަނުން ހާމަކުރެއްވި ގޮތުގައި ކުށްކޮށްގެން ދައުލަތަށް ގެއްލޭ ފައިސާ އަނބުރާ ހޯދުމާ ބެހޭ ޤާނޫނެއް އެކުލަވާލުމުގެ މަސައްކަތް ދަނީ ކުރެވެމުންނެވެ.
އުޝާމް ވިދާޅުވި ގޮތުގައި މަޤާމާ އޭނާ ހަވާލުވުމަށްފަހު އޭސީސީއާ މަޝްވަރާކޮށް، އެސެޓް ރިކަވަރީ ކޮމިޝަނުން ބިލުގެ މަސައްކަތް ވަނީ ކުރިޔަށް ގެންގޮސްފައެވެ. އެހެންނަމަވެސް، އޭސީސީން އަދިވެސް ބިލް ބަންޑާރަނައިބުގެ އޮފީހަށް ފޮނުވާފައި ނުވާތީ، އެ އޮފީހުން އަމިއްލައަށް ބިލެއް ޑްރާފްޓްކޮށް މަޖިލީހަށް ހުށަހެޅުމަށް ނިންމާފައިވާ ކަމަށް އުޝާމް ވިދާޅުވިއެވެ.
ކުރީގެ ސަރުކާރުން ބަދަލުގެ ގޮތުގައި އެއް ބިލިއަނެއްހާ ރުފިޔާގެ އެސެޓްތައް އެކި ފަރާތްތަކަށް ދީފައިވާ ކަމަށާއި، ގިނައިން ބަދަލުގެ ގޮތުގައި ދީފައި ހުރީ ރަށްތަކާއި ފަޅުތައް ކަމަށް އުޝާމް ފާހަގަކުރެއްވިއެވެ. މި ކަންކަން ކޮށްފައިވަނީ ޤާނޫނާ ޚިލާފަށް ކަމަށް ޤަބޫލުކުރައްވާ ކަމަށާއި، ޤާނޫނީ އިޖުރާއަތުގެ ތެރެއިން އެއްބަސްވުންތައް ބާޠިލުކުރެވޭނެ ގޮތްތައް ބަލަމުންދާ ކަމަށްވެސް އުޝާމް ވިދާޅުވިއެވެ.
ނޮވެންބަރު މަސް ނިމުމުގެ ކުރިން މި މަސައްކަތް ނިމޭނެ ކަމަށް ބެލެވޭ ކަމަށާއި، ނުއަގުގައި ދައުލަތުގެ އެސެޓްތައް ދޫކޮށްފައިވާތީ، އެތަކެއްޗަށް ހަމައަގު ހޯދައި އެސެޓް ރިކަވަރކުރުމުގެ މަސައްކަތް ސަރުކާރުން ހުއްޓާނުލައި ކުރިއަށް ގެންދަވާނެ ކަމަށްވެސް ބަންޑާރަނައިބު އަހްމަދު އުޝާމް ވިދާޅުވިއެވެ.
