ރައީސް ޑރ. މުހައްމަދު މުއިއްޒުގެ ސަރުކާރުން ސިޔާސީ މަގާމުތަކާއި ސަރުކާރުގެ ކުންފުނިތަކަށް 7،000 އަށް ވުރެ ގިނަ މުވައްޒަފުން ނެގި ކަމަށް ދެކެވޭ ވާހަކައަކީ "ބުހުތާނު ދޮގު" އެއް ކަމަށް ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވެއްޖެއެވެ.
"އަދަދު" ނޫހުން ގެނެސްދިން މި ހަބަރު ދޮގުކުރައްވައި، ހީނާ "އެކްސް" ގައި ކުރެއްވި ޕޯސްޓެއްގައި ފާހަގަކުރެއްވި ގޮތުގައި ހަގީގަތް ނުބަލައި މިފަދަ ވާހަކަތައް ފެތުރުމަކީ ޒިންމާދާރު ނޫސްވެރިކަމެއް ނޫނެވެ. އަދި ޕީސީބީގެ ތަފާސް ހިސާބުތަކުން ދައްކާ ގޮތުގައި މިދިޔަ އަހަރުގެ ފަހު ކުއާޓަރއާ އަޅާބަލާއިރު މި އަހަރުގެ ފުރަތަމަ ކުއާޓަރގައި ސަރުކާރު ކުންފުނިތަކުގެ މުވައްޒަފުންގެ އަދަދު 1،000 އަށް ވުރެ ދަށްވެފައިވާ ކަމަށް ހީނާ ފާހަގަކުރެއްވިއެވެ.
ހީނާ އިތުރަށް ވިދާޅުވީ މިފަދަ ދޮގު ހަބަރުތައް ފަތުރަނީ ސަރުކާރުގެ ޚަރަދުތައް ކުޑަކުރުމަށާއި ގައުމު ދަރަނީގެ އަނދަވަޅުން ސަލާމަތްކުރުމަށް ރައީސުލްޖުމްހޫރިއްޔާ ކުރައްވާ މަސައްކަތްޕުޅުތައް ރައްޔިތުން ބަލައިގަންނާތީ، ކަމުގެ ހަގީގަތް އޮޅުވާލުމަށް ކަމަށެވެ.
ރައީސް ޑރ. މުއިއްޒު "އެކްސް" ގައި ކުރެއްވި ޕޯސްޓެއްގައި ވިދާޅުވެފައިވަނީ އިގްތިޞާދީ ރިފޯމު އެޖެންޑާގެ ދަށުން ކުރިއަށް އޮތް 15 ދުވަހުގެ ތެރޭގައި އެކި މިނިސްޓްރީތަކުން 228 މުވައްޒަފުން ވަކިކުރަން އަންގަވާފައިވާ ކަމަށެވެ. މީގެ ސަބަބުން ދައުލަތުގެ ބަޖެޓުން މަހަކު 5.7 މިލިއަނަށް ވުރެ ގިނަ ރުފިޔާ ސަލާމަތްކުރެވޭނެ ކަމަށް ރައީސް ފާހަގަކުރެއްވިއެވެ.
މީގެ އިތުރުން، ސިޔާސީ މުވައްޒަފުންގެ އަދަދު މަދުކުރުމުގެ މަސައްކަތް މީގެ ހަތަރު މަސް ކުރިން ފެށިގެން ކުރިއަށްދާ ކަމަށާއި، މި ގޮތުން ހާޒިރީ ދަށް މީހުންނާއި އެކަށީގެންވާ މަސައްކަތެއް ނުކުރާ ބައެއް މުވައްޒަފުން ވަކިކޮށް، އަނެއްބައި މުވައްޒަފުން ސަރުކާރުގެ ކުންފުނިތަކަށް ބަދަލުކޮށްފައިވާ ކަމަށް ބުނެވެއެވެ.
ރައީސް ޑރ. މުއިއްޒުގެ ވައުދަކީ މި ސަރުކާރުގެ ސިޔާސީ މަގާމުތައް 700 އަށް ވުރެ އިތުރު ނުކުރުން ކަމަށްވެސް ފާހަގަކުރެވެއެވެ.
