ޖަލަށް މަނާ ތަކެތި ވެއްދުމުގެ ތުހުމަތުގައި ހައްޔަރުކޮށް ދަޢުވާ އުފުލާފައިވާ ކަރެކްޝަނަލް ސަރވިސްގެ މުވައްޒަފުން ޝަރުތުތަކާއެކު ބަންދުން ދޫކޮށްލުމަށް ދައުލަތުން އިއުތިރާޒެއް ނެތްކަމަށް ބުނެފިއެވެ.
މި މައްސަލައިގައި ފުލުހުންނާއި އެންޓި ކޮރަޕްޝަން ކޮމިޝަން ގުޅިގެން ތަޙްޤީޤެއް ހިންގައި، 5 މީހެއްގެ މައްޗަށް ދަޢުވާކުރުމަށް ކްރިމިނަލް ކޯޓަށް ހުށަހަޅާފައިވެއެވެ. އޭގެ ތެރެއިން 3 މީހަކާއެކު އިޢުތިރާފުގެ އެއްބަސްވުމެއް ހެދުމަށް ދައުލަތުން ނިންމާފައިވާ ކަމަށް ޕްރޮސިކިއުޓަރ ޖެނެރަލްގެ އޮފީހުން ބުނެފައިވެއެވެ.
ކްރިމިނަލް ކޯޓުގައި ބޭއްވުނު ބަންދު މުރާޖަޢާ އަޑުއެހުމުގައި ދިފާޢީ ވަކީލުން ވަނީ މި މައްސަލައިގައި ހިމެނޭ އެހެން މީހެއްގެ ބަންދު މުރާޖަޢާއިން ދޫވެފައިވާތީ، އެމީހުންގެ މުވައްކިލުންވެސް ދޫކޮށްލުމަށް އެދިފައެވެ. ދައުލަތުންވެސް ވަނީ ޝަރީޢަތް ނިމެންދެން ބަންދުގައި ބެހެއްޓުމުގެ ބަދަލުގައި ޝަރުތުތަކަކާއެކު ދޫކޮށްލުމަށް އެދިފައެވެ. މީގެ ތެރޭގައި ޕާސްޕޯޓު ހިފެހެއްޓުމާއި، ޝަރީޢަތަށް ހާޒިރުވާނެކަން ޔަޤީންކުރުމާއި، ޝަރީޢަތަށް ހުރަސްއެޅޭފަދަ ކަމެއް ނުކުރުން ހިމެނެއެވެ.
މި މައްސަލައިގައި ދެން އޮންނަ އަޑުއެހުމެއްގައި މި މީހުންގެ ބަންދާމެދު ގޮތެއް ނިންމުމަށް ވަނީ ހަމަޖެހިފައެވެ. މި މައްސަލައިގައި ދަޢުވާ ލިބިފައިވާ ފަރާތްތަކަކީ ކަރެކްޝަނަލް ސަރވިސްގެ މުވައްޒަފުންގެ ގޮތުގައި ތިބެ، ޤާނޫނާ ޚިލާފަށް ޖަލަށް މަނާ ތަކެތި ވެއްދުމުގެ ތުހުމަތުގައި ހައްޔަރުކުރެވުނު ބައެކެވެ.
