ޓޫރިޒަމާ ބެހޭ ގާނޫނަށް މުހިންމު އިސްލާހުތަކެއް ގެނައުމަށް ރައްޔިތުންގެ މަޖިލީހަށް ބިލެއް ސަރުކާރުން ހުށަހަޅައިފިއެވެ. މައްޗަންގޮޅި ދެކުނު ދާއިރާގެ ޕީއެންސީ މެންބަރު މުސްތަފާ ހުސައިން ސަރުކާރުގެ ފަރާތުން ހުށަހެޅުއްވި މި ބިލުގެ ފުރަތަމަ ކިޔުން އިއްޔެގެ މަޖިލިސް ޖަލްސާގައި ވަނީ އިއްވާފައެވެ.
މި ބިލުގެ މައިގަނޑު އެއް ބަދަލަކީ ޓޫރިސްޓު ބޭނުމަށް ރަށްތަކާއި ބިންތަކާ އަދި ފަޅުތައް ކުއްޔަށް ދިނުމުގެ ކުރިން ރައީސް އޮފީހުގެ ހުއްދަ ހޯދަން ނުޖެހޭ ގޮތަށް ހެދުމެވެ. މިއީ ކުރީގެ ރައީސް އަބްދުﷲ ޔާމީން އަބްދުލްގައްޔޫމުގެ ވެރިކަމުގައި އެމްއެމްޕީއާރުސީގެ ހިޔާނާތާ ގުޅިގެން ގެނެވުނު ބަދަލެއް އުވާލުމެވެ.
އިތުރު މުހިންމު ބަދަލެއްގެ ގޮތުގައި، ޓޫރިޒަމަށް ދޫކުރާނެ ރަށްތަކާއި ބިންތަކާއި ފަޅުތަކުގެ ލިސްޓު އެކުލަވާލުމުގައި އަދި އެއަށް އުނިއިތުރު ގެނައުމުގައި މަޝްވަރާކުރަންޖެހެނީ ރައީސް އޮފީހުގެ ބަދަލުގައި ސީދާ ރައީސުލްޖުމްހޫރިއްޔާއާ ކަމަށް ބަޔާންކޮށްފައިވެއެވެ. މިއީ ކުރިން ރައީސް އޮފީހުގެ މަޝްވަރާގެ މަތިން ކުރަމުން އައި ކަމެކެވެ.
މީގެ އިތުރުން، މި ބިލުގައި ޓޫރިސްޓުންގެ އަތުން ނަގާ ގްރީން ޓެކްސް އަންނަ އަހަރުން ފެށިގެން ދެ ގުނަ ކުރުމަށްވެސް ހުށަހަޅާފައިވެއެވެ.
