ރައީސް ޑރ. މުހައްމަދު މުއިއްޒުގެ ނިންމެވުމާ އެއްގޮތަށް ރާއްޖޭގައި ވޭޕް މަނާކުރުމަށްޓަކައި ގާނޫނުތަކަށް ގެންނަންޖެހޭ އިސްލާހުތައް މި ހަފުތާގެ ތެރޭގައި މަޖިލީހަށް ފޮނުވުމަށް މަސައްކަތް ކުރަމުންދާ ކަމަށް ބަންޑާރަ ނައިބު އަހުމަދު އުޝާމް ވިދާޅުވެއްޖެއެވެ.
ރައީސް މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ ވޭޕްކުރުމަށް ބޭނުންކުރާ ތަކެއްޗާއި އޭގެ ވަކިވަކި ބައިތައް ރާއްޖެއަށް އެތެރެކުރުން 2024 ނޮވެމްބަރު 15 އިން ފެށިގެން މަނާކުރުމަށާއި، އަދި 2024 ޑިސެމްބަރު 15 އިން ފެށިގެން ރާއްޖޭގައި ވޭޕްކުރުމަށް ބޭނުންކުރާ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، އިޝްތިހާރުކުރުމާއި ހިލޭ ބެހުން މަނާކުރުމަށް ކަމާބެހޭ ފަރާތްތަކަށް އަންގަވާފައިވާ ކަމަށެވެ.
ރައީސްގެ މި ނިންމެވުމަށް މަރުހަބާ ވިދާޅުވަމުން، އުޝާމް ވިދާޅުވެފައިވަނީ މިއީ ޅަދަރިންނާއި ޒުވާނުންގެ އިތުރުން މުޅި ޤައުމުގެ ރައްޔިތުންގެ ހައްޤުގައި ނިންމަވާފައިވާ ނިންމެވުމެއް ކަމަށެވެ. މި ނިންމެވުން ތަންފީޒުކުރުމަށްޓަކައި ދުންފަތް ކޮންޓްރޯލްކުރުމާބެހޭ ޤާނޫނާއި ދިވެހިރާއްޖޭގެ އެކްސްޕޯޓް އިމްޕޯޓް ޤާނޫނަށް އިސްލާހު ގެނައުމަށް މަޖިލީހަށް ހުށަހެޅުމަށް ނިންމާފައިވާ ކަމަށް އުޝާމް ހާމަކުރެއްވިއެވެ.
މި އިސްލާހުތައް މި ހަފުތާގެ ތެރޭގައި މަޖިލީހަށް ފޮނުވުމަށް މަސައްކަތްތައް ކުރިއަށްދާ ކަމަށްވެސް އުޝާމް ފާހަގަކުރެއްވިއެވެ.
