ރާއްޖޭގައި ބޭހުގެ އަގު ކަނޑައެޅުމުގައި ނިޒާމީ އުސޫލެއް ނެތްކަން އެންޓި-ކޮރަޕްޝަން ކޮމިޝަން (އޭސީސީ) އިން ވަނީ ފާހަގަކޮށްފައެވެ.
މިކަން ހާމަކޮށްފައިވަނީ އޭސީސީން އެކުލަވާލާފައިވާ ރާއްޖޭގެ ސިއްހީ ވެލްފެއާ ނިޒާމުގެ ކޮރަޕްޝަން ރިސްކް އެސެސްމަންޓް ރިޕޯޓުގައެވެ. މި ރިޕޯޓުގައި އިތުރަށް ފާހަގަކޮށްފައިވާ ގޮތުގައި، ރާއްޖެ އެތެރެކުރާ ބޭހުގެ ސްޓޮކް މަރުކަޒީ ގޮތެއްގައި ބެލެހެއްޓުމާއި މޮނިޓަރކުރުމުގެ ނިޒާމެއް ލިޔުމުން އެކުލަވާލާފައި ނުވެއެވެ. އަދި ބޭހުގެ ބާރު ނުވަތަ ސްޓްރެންތާއި ވޮލިއުމްއަށް ބަލައި ވިއްކާނެ އަގުތައް ކަނޑައަޅާފައި ނުވާކަންވެސް ވަނީ ފާހަގަކުރެވިފައެވެ.
މި ކަންކަމުގެ ސަބަބުން ކޮރަޕްޝަނަށް މަގުފަހިވެ، އާސަންދައިން ފޯރުކޮށްދޭ ސިއްހީ ޚިދުމަތްތައް ލަސްވެގެންދާކަމަށް އޭސީސީން ބުނެފައިވެއެވެ. ރައްޔިތުންގެ ދުޅަހެޔޮކަމާއި ފުރާނައާ ގުޅިފައިވާ މި މުހިންމު މައްސަލަ ހައްލުކުރުމަށްޓަކައި، ބޭހާ ގުޅޭ ކަންކަމުގައި ނަޒާހަތްތެރިކަން ކަށަވަރުކޮށް ކޮރަޕްޝަން ހުއްޓުވުމަށް އެކަށީގެންވާ ގަވާއިދުތައް އެކުލަވާލުމަށް އޭސީސީން ވަނީ ލަފާދީފައެވެ.
ސިއްހީ ނިޒާމުގައި ހުރި މިފަދަ މައްސަލަތައް ހައްލުކުރުމަށް އޭސީސީން ޖުމްލަ 20 ލަފައެއް ދީފައިވެއެވެ. މީގެ ތެރޭގައި ކޮރަޕްޝަނަށް މަގުފަހިވާ ކަންކަން ހައްލުކޮށް، ހަމަހަމަކަމާއެކު ވެލްފެއަރގެ ނިޒާމު ދެމެހެއްޓުމަށް 14 ލަފައަކާއި، މުޅި ސިއްހީ ނިޒާމު ހަރުދަނާކުރުމަށް 6 ލަފައެއް ހިމެނެއެވެ. މި ލަފާތަކުގެ މައިގަނޑު މަޤްޞަދަކީ ރާއްޖޭގެ ސިއްހީ ނިޒާމުގައި ހުރި އިދާރީ އަދި ޤާނޫނީ ހުސްކަން ފޫބައްދައި، ނަޒާހަތްތެރި އަދި ހަރުދަނާ ނިޒާމެއް ޤާއިމްކުރުމެވެ.
