މަދަނީ ބޭނުންތަކަށް ޑްރޯން އޮޕަރޭޓް ކުރުމާބެހޭ ގަވާއިދަށް އާންމުގެ މަޝްވަރާ ހޯދަނީ

ރާއްޖޭގެ ސިވިލް އޭވިއޭޝަން އޮތޯރިޓީން މަދަނީ ބޭނުންތަކަށް ޑްރޯން އޮޕަރޭޓް ކުރުމާބެހޭ ގަވާއިދުތަކެއް އެކުލަވާލައި، އެ ގަވާއިދުތަކަށް އާންމު މަޝްވަރާއާއި ޚިޔާލު ހޯދުމަށް ހުޅުވާލައިފިއެވެ. މިގޮތުން 2024 ވަނަ އަހަރުގެ އޮގަސްޓު 15 އިން ފެށިގެން ނޮވެމްބަރު 15 ގެ ނިޔަލަށް ޚިޔާލު ހުށަހެޅުމުގެ ފުރުޞަތު ވަނީ ދީފައެވެ.

މި ގަވާއިދުތަކުގެ ތެރޭގައި ހިމެނެނީ MCAR-UAS A އާއި MCAR-UAS B އެވެ. ސަރުކާރުގެ މުއައްސަސާތަކާއި، ކުންފުނިތަކާއި، ޖަމިއްޔާ ޖަމާއަތްތަކާއި އަދި އަމިއްލަ ފަރުދުންނަށް ވެސް މި ގަވާއިދުތަކާ ގުޅޭގޮތުން މަޝްވަރާއާއި ޚިޔާލު ހުށަހެޅިދާނެއެވެ. ޚާއްޞަކޮށް ޑްރޯން އޮޕަރޭޓްކޮށްގެން ވިޔަފާރީގެ މަސައްކަތްކުރާ ފަރާތްތަކާއި، އިޝްތިހާރުކުރުމާއި މާކެޓިންގ މަސައްކަތްކުރާ ފަރާތްތަކުގެ ޚިޔާލާއި މަޝްވަރާ ހޯދުމަށް ސިވިލް އޭވިއޭޝަން އޮތޯރިޓީން ވަނީ އިލްތިމާސްކޮށްފައެވެ.

މި ގަވާއިދުތައް އެކުލަވާލުމުގައި ޔޫރަޕުގެ މަދަނީ ގަވާއިދުތައް ވަނީ އަސްލެއްގެ ގޮތުގައި ބޭނުންކޮށްފައެވެ. މީގެ މައިގަނޑު މަޤްޞަދަކީ ސަލާމަތާއި އަމާންކަމާއި އަދި ޒާތީ މަޞްލަޙަތަށް އުނިކަމެއް ނާންނާނެ ގޮތަށް، މުނިފޫހިފިލުވުމަށާއި ވިޔަފާރީގެ ބޭނުންތަކަށް ޑްރޯން ދުއްވުމުގެ ފުރުޞަތު ހުޅުވައިލުމެވެ.

ގަވާއިދުތަކުގައި ޑްރޯން އޮޕަރޭޓުކުރުން ބަހާލެވިފައިވަނީ އޯޕަން، ސްޕެސިފިކް އަދި ސެޓިފައިޑް މި ތިން ކެޓަގަރީއަށެވެ. މީގެ އިތުރުން، ދިވެހިރާއްޖޭގެ ސަރަޙައްދު ޖޯގުރަފީ ޒޯންތަކަކަށް ބަހާލެވި، ޑްރޯން ދުއްވުން މަނާ ސަރަޙައްދުތަކާއި، ޚާއްޞަ ހުއްދަ ބޭނުންވާ ސަރަޙައްދުތަކާއި، އަދި ހުޅުވާލެވިފައިވާ ސަރަޙައްދުތައް ކަނޑައެޅިގެންދާނެއެވެ. އަދި މީގެ އިތުރުން ޑްރޯން ދުއްވާ ފަރާތްތައް ރަޖިސްޓަރީކުރުމާއި ޕައިލެޓުންގެ ފެންވަރު ކަނޑައެޅުމުގެ ކަންކަންވެސް މި ގަވާއިދުތަކުގައި ހިމެނޭނެއެވެ.

ނަމަވެސް، މި ގަވާއިދުތަކަކީ ހަމައެކަނި މަދަނީ ބޭނުންތަކަށް އަމާޒުކުރެވިފައިވާ ގަވާއިދުތަކެއް ކަމުން، އަސްކަރީ ޑްރޯން ޙަރަކާތްތަކުގެ މައްޗަށް މި ގަވާއިދުތަކެއް ނުހިނގާނެއެވެ. ދިވެހިރާއްޖޭގެ އަސްކަރިއްޔާގެ ޑްރޯންތަކާއި އޮޕަރޭޝަންތަކުގެ މައްޗަށް ހިނގާނީ އަސްކަރިއްޔާގެ އަމިއްލަ ގަވާއިދުތަކެވެ.