ބީއެމްއެލްގެ މުވައްޒަފެއް ކަސްޓަމަރުންގެ އެކައުންޓުން ވަގަށް ފައިސާ ނެގިކަން ސާބިތުވެގެން ކްރިމިނަލް ކޯޓުން އިއްޔެ ހުކުމްކޮށްފިއެވެ. މި މައްސަލައިގައި ހުކުމް އިއްވާފައިވަނީ ބ. އޭދަފުށީ ހިޔާވަހި އަލީ މާޒިންގެ މައްޗަށެވެ. މާޒިންގެ މައްޗަށް ހިޔާނާތުގެ ދަޢުވާ އުފުލާފައިވަނީ، އޭނާ ބީއެމްއެލްގެ ކަސްޓަމަރ ސަރވިސް އެސިސްޓެންޓެއްގެ ގޮތުގައި މަސައްކަތްކުރަމުން، ލިބިފައިވާ މަޢުލޫމާތާއި ބާރުގެ ބޭނުން ނަހަމަ ގޮތުގައި ހިފައި، 2021 ގެ މެއި 14 އިން ސެޕްޓެމްބަރު 23 އާ ދެމެދު ގިނަ ދުވަސްތަކެއްގައި ކަސްޓަމަރުންގެ އެކައުންޓުތަކުން ފައިސާ ނެގި މައްސަލައިގައެވެ.
ހުކުމުގައި ބަޔާންކޮށްފައިވާ ގޮތުގައި، މާޒިން ވަނީ 13 ކަސްޓަމަރެއްގެ މަޢުލޫމާތު ބީއެމްއެލްގެ ސީއާރްއެމް ސިސްޓަމުން ބަދަލުކޮށް، އެ ކަސްޓަމަރުންގެ ހުއްދަ ނެތި އިންޓަނެޓް ބޭންކިންގ ރަޖިސްޓަރ ކޮށްފައެވެ. މިގޮތުން، އެ 13 މީހުންގެ އެކައުންޓުތަކުން ޖުމްލަ 482,611.41 ރުފިޔާ ޞައްޙަ ނޫން ކްރެޑިޓް ކާޑު ޕޭމަންޓާއި ފޮރެކްސް ޓްރާންސެކްޝަންގެ ގޮތުގައި މާޒިންގެ އަމިއްލަ އެކައުންޓަށް ޖަމާކޮށްފައިވާކަން ފާހަގަކޮށްފައިވެއެވެ.
މާޒިން ވަނީ މި ދަޢުވާއަށް އިޢުތިރާފުވެފައެވެ. އަދި މައްސަލަ ކުރިއަށް ގެންގޮސްފައިވަނީ އަވަސް ނިޔާއިންނެވެ. ޕްރޮސިކިއުޓަރ ޖެނެރަލްގެ އޮފީހާއެކު މާޒިން ވެފައިވާ އެއްބަސްވުމުގައި، މި ކުށަކީ 4 ވަނަ ދަރަޖައިގެ ކުށެއްކަމަށާއި، އޭގެ އަސްލު އަދަބަކީ 1 އަހަރާއި 7 މަހާއި 6 ދުވަހުގެ ޖަލު ޙުކުމެއް ކަމަށް ބަޔާންކޮށްފައިވެއެވެ. ނަމަވެސް، އެއްބަސްވުމާ ގުޅިގެން މި އަދަބު 9 މަހާއި 18 ދުވަހަށް ކުރުކޮށްދީފައިވެއެވެ.
އިތުރުން، މި ޖަލު ޙުކުމް 40 ގަޑިއިރުގެ މުޖުތަމަޢުއަށް ޚިދުމަތްކުރުމާއި 56,200 ރުފިޔާގެ ޖޫރިމަނާއަކަށް ބަދަލުކުރެވޭނެ ގޮތަށް އެއްބަސްވެފައިވެއެވެ. އަދި ބީއެމްއެލްއާއެކު މާޒިން ވެފައިވާ އެއްބަސްވުމުގައިވާ ގޮތަށް ގެއްލުމުގެ ބަދަލު ދެއްކުމަށްވެސް އެއްބަސްވެފައިވެއެވެ.
މިގޮތުން ކޯޓުން ޙުކުމްކޮށް، ޖޫރިމަނާގެ ފައިސާ ތިން މަސް ދުވަހުގެ ތެރޭގައި މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އަށް ދެއްކުމަށް އަމުރުކޮށްފައިވެއެވެ.
