އދ. ގެ ޕާޓްނަޝިޕްސް އިން އިންތިޒާމުކޮށްގެން ބޭއްވި އެސްޑީޖީ ލައުންޖް ސެޝަންގައި ރާއްޖޭގެ މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް އެނާރޖީ، ތޯރިގް އިބްރާހީމް ބައިވެރިވެވަޑައިގެންފިއެވެ.
މި ސެޝަންގައި ތޯރިގް ވަނީ މިޝަން 1.5 އާ ގުޅޭ ގޮތުން ޓައިމްގެ ނޫސްވެރިޔާ ޖަސްޓިން ވޯލަންޑްއާ އެކު ފަޔަރސައިޑް ޗެޓެއްގައި ބައިވެރައިވެރިވެވަޑައިގެންފައެވެ.
މި ބައްދަލުވުމުގައި މިނިސްޓަރ ތޯރިގް ވަނީ ދުނިޔޭގެ ހޫނުމިން 1.5 ޑިގްރީ ސެލްސިއަސްއަށްވުރެ މަތިނުވާނެ ގޮތަށް ހިފެހެއްޓުމުގެ މުހިންމުކަމާއި، ކުދި ޖަޒީރާ ޤައުމުތަކުން އެ ޤައުމުތަކުގެ އެންޑީސީ (ނެޝަނަލީ ޑިޓަރމައިންޑް ކޮންޓްރިބިއުޝަން) ލަނޑުދަނޑިތައް ހާސިލުކުރުމަށް އެހީތެރިވެދިނުމުގެ މުހިންމުކަމާ ބެހޭ ގޮތުން ވާހަކަފުޅު ދައްކަވާފައެވެ.
މި ސެޝަން ބޭއްވުނީ މިހާރު ކުރިއަށްދާ އދ. ގެ ޖެނެރަލް އެސެމްބްލީގެ 79 ވަނަ ދައުރުގެ ތެރޭގައެވެ. މި ސެޝަނަކީ ދެމެހެއްޓެނިވި ތަރައްޤީގެ ލަނޑުދަނޑިތައް ހާސިލުކުރުމަށް ކުރެވޭ މަސައްކަތްތަކާ ގުޅޭ ގޮތުން މަޝްވަރާކުރުމަށް ބޭއްވުނު ސެޝަނެކެވެ.
