މާލޭ ސަރަހައްދުގައި ދުއްވާ، އެހެން ޒޯންތަކަށް ރަޖިސްޓަރީކޮށްފައިވާ ވެހިކަލްތަކުގެ މައްސަލަ ހައްލުކުރުމަށް ފުލުހުން އައު ފިޔަވަޅުތަކެއް އަޅަން ފަށައިފިއެވެ. މިގޮތުން، ހުޅުމާލޭގައި ވަގުތީގޮތުން ޕާކުކުރުމަށް ކަނޑައެޅި ސަރަހައްދަށް ނުގެންދާ އުޅަނދުތަކުގައި ސްޓިކާ ޖެހުމުގެ މަސައްކަތް ފަށައިފިއެވެ.
ފުލުހުން މަޢުލޫމާތު ދެއްވާގޮތުގައި، އޭ ޒޯނު ފިޔަވައި އެހެން ޒޯންތަކުގައި ރަޖިސްޓަރީކޮށްފައިވާ އުޅަނދުތައް ގާނޫނާއި ގަވާއިދަށް ފެއްތުމަށް ފުރުސަތު ދެވިފައިވެއެވެ. މި އުޅަނދުތައް ހުޅުމާލެ ދެވަނަ ފިޔަވަހީގެ އެމްއޭސީއެލް ފްލެޓުތަކާ ކައިރީގައިވާ ހުސްބިމަށް ގެންދިއުމަށް އަންގައި، ސްޓިކާ ޖަހަމުންދާކަމަށް ފުލުހުން ވިދާޅުވެއެވެ. އަދި ސްޓިކާގައިވާ ސުންގަޑީގެ ކުރިން އުޅަނދު ނެގުމަށް ވެރިފަރާތްތަކަށް އަންގާފައިވާކަމަށްވެސް ފުލުހުން ވިދާޅުވިއެވެ.
ސަރުކާރުން ކަނޑައަޅާފައިވާ މި ސަރަހައްދުގައި އުޅަނދުތައް ބެހެއްޓުމަށް ދެވިފައިވަނީ 6 މަސްދުވަހުގެ މުއްދަތެކެވެ. މި މުއްދަތުގެ ތެރޭގައި އުޅަނދުތައް ގަވާއިދުގެ ތެރެއިން ރަޖިސްޓަރީ ކުރަންޖެހެއެވެ. މިދިޔަ އޯގަސްޓް 21 ގައި މި ބިމުގައި އުޅަނދު ބެހެއްޓުމުގެ ފުރުސަތު ހުޅުވާލިއިރު، އެއްވެސް އަގަކާ ނުލައި އުޅަނދުތައް ބެހެއްޓޭގޮތަށް ހަމަޖެހުނެވެ. ނަމަވެސް ފުރަތަމަ 40 ދުވަހުގެ ތެރޭގައި އެތަނަށް ނުގެންދާ އުޅަނދުތައް ޓޯކުރާނެކަމަށް ފުލުހުން އިންޒާރުދެއްވާފައިވެއެވެ.
ފުލުހުންގެ ތަފާސްހިސާބުތަކުން ދައްކާގޮތުގައި، ހަމައެކަނި ހުޅުމާލޭގައިވެސް ގަވާއިދާ ޚިލާފަށް ރަޖިސްޓަރީނުކޮށް ނުވަތަ އެހެން ޒޯނެއްގައި ރަޖިސްޓަރީކޮށްފައިވާ 500 އަށްވުރެ ގިނަ އުޅަނދު ޕާކުކޮށްފައި އޮތެވެ. ސަރުކާރުން ބިން ދެއްކި ނަމަވެސް، މި މައްސަލަ ހައްލުކުރުމަށް އެކަށީގެންވާ އެއްބާރުލުމެއް ލިބެމުންނުދާކަން ފުލުހުން ފާހަގަކުރައްވައެވެ.
މީގެއިތުރުން، ހަތަރުފުރޮޅުލީ އެހެން އުޅަނދުތައް ޕާކުކުރުމަށްޓަކައި، ހުޅުމާލެ ފޭސް 1 ގެ ޕޮލިސް ފްލެޓް ކުރިމަތިން ހުސްބިމެއް ސަރުކާރުން ވަނީ ކަނޑައަޅާފައެވެ. މި ފިޔަވަޅުތަކަކީ މާލޭ ސަރަހައްދުގެ ޓްރެފިކް މައްސަލަތައް ހައްލުކުރުމަށް އެޅޭ މުހިންމު ފިޔަވަޅުތަކެއްކަމަށް ބެލެވެއެވެ.
