ހުޅުމާލޭގެ ފޭސް އެކަކާއި ދޭކާ ގުޅުވައިދޭ ބްރިޖުގައި ލޮރީއަކާއި ސައިކަލެއް މުޑިއަރާ، ނުރައްކާތެރި އެކްސިޑެންޓެއް ހިނގައިފިއެވެ.
މި ހާދިސާގައި ސައިކަލް ދުއްވަމުންދިޔަ 24 އަހަރުގެ ޒުވާނަކަށް އެކި ވަރުގެ އަނިޔާތަކެއް ލިބި، މިހާރު ވަނީ ހުޅުމާލެ ހޮސްޕިޓަލުގައި ފަރުވާ ދެމުންނެވެ. އެކްސިޑެންޓްގައި ޖެހުނު ލޮރީއަކީ އެޗްޑީސީން މަގުތަކަށް ފެން ޖެހުމަށް ބޭނުންކުރާ އުޅަނދެއްކަން ފާހަގަކުރެވެއެވެ.
ފުލުހުން މިކަމާ ގުޅޭގޮތުން ހިއްސާކުރި މަޢުލޫމާތުގައި، މި ހާދިސާއާ ގުޅިގެން ފުލުހުން ހަރަކާތްތެރިވަމުންދާކަން ބަޔާންކޮށްފައިވެއެވެ. ފާއިތުވި ދުވަސްތަކުގައި މާލެ ސަރަހައްދުގައި މިފަދަ އެކްސިޑެންޓްތައް އިތުރުވެފައިވާކަން ފާހަގަކުރެވެއެވެ. ދާދި ފަހުން ވެސް ހުޅުމާލޭގައި ކާރަކާއި ސައިކަލެއް ޖެހި، އެކްސިޑެންޓެއް ހިނގައި މީހަކު ނިޔާވެފައިވެއެވެ.
މި ހާދިސާތަކާ ގުޅިގެން، މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި ފުލުހުން އިތުރު ފިޔަވަޅުތަކެއް އަޅަމުންދާކަން އަންގާފައިވެއެވެ. މީގެ ތެރޭގައި މާލެއާއި ހުޅުމާލޭގެ އެކި ސަރަހައްދުތަކުގައި ވެހިކަލް ޗެކްޕޮއިންޓްތައް ގާއިމުކޮށް، އުޅަނދުފަހަރު ބަލައި ފާސްކުރުމުގެ މަސައްކަތް ހިމެނެއެވެ.
