ހުޅުމާލޭ ދެވަނަ ފިޔަވަހީގައި އަލަށް ޤާއިމްކޮށްފައިވާ ހައިވޯލްޓޭޖް ސަބްސްޓޭޝަން ގްރޭޓަރ މާލެ އިންޓަރކަނެކްޝަން ގްރިޑާ ގުޅުވާލައި، އެ ސަބްސްޓޭޝަން މިހާރު ވަނީ ކާމިޔާބުކަމާއެކު އެނަރޖައިޒް ކުރެވިފައި ކަމަށާއި، މި މަސައްކަތުގައި ދިމާވި ޓެކްނިކަލް މައްސަލައިގެ ސަބަބުން ކަރަންޓު ކެނޑު ހުރިހާ ސަރަހަދަކަށް ކަރަންޓު މިހާރު ދީފައިވާކަމަށް ސްޓެލްކޯއިން ބުނެފިއެވެ.
މި މަސައްކަތުގެ ތެރެއިން ދިމާވި ޓެކްނިކަލް މައްސަލައަކާ ގުޅިގެން ހުޅުމާލެއާއި މާލޭގެ ބައެއް ސަރަޙައްދުތަކުން ކަރަންޓުގެ ޚިދުމަތް ވަގުތީގޮތުން މެދުކެނޑުނެވެ.
ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން މިކަމާ ގުޅޭގޮތުން ކުރި އެކްސް ޕޯސްޓުގައި ވިދާޅުވެފައިވަނީ، ކަރަންޓުގެ ޚިދުމަތް މެދުކެނޑުނު ހުރިހާ ސަރަޙައްދުތަކަށް މިހާރު ވަނީ އަލުން ޚިދުމަތް ދެވިފައި ކަމަށެވެ. އަދި މި ޙާދިސާއާ ގުޅިގެން ރައްޔިތުންނަށް ދިމާވި ދަތިތަކަށް މަޢާފަށް އެދިފައިވެއެވެ.
"މިފަދަ ޙާލަތްތަކުގައި ރައްޔިތުން ދެއްވާ އެއްބާރުލެއްވުމަށް ޝުކުރު ދަންނަވަމެވެ," ސްޓެލްކޯގެ އެކްސް ޕޯސްޓުގައި ބުނެފައިވެއެވެ.
އިތުރަށް، ކަރަންޓުގެ ޚިދުމަތް ލިބުމުގައި އެއްވެސް މައްސަލައެއް ދިމާވާނަމަ ސްޓެލްކޯގެ އެމަރޖެންސީ ނަންބަރު 104 އަށް ގުޅުމަށް އާންމުންނަށް އިލްތިމާސް ކޮށްފައިވެއެވެ.
މި އާ ސަބްސްޓޭޝަން ގްރޭޓަރ މާލެ އިންޓަރކަނެކްޝަން ގްރިޑާ ގުޅުވާލުމުން، ހުޅުމާލޭ ދެވަނަ ފިޔަވަހީގެ ކަރަންޓުގެ ޚިދުމަތް އިތުރަށް ހަރުދަނާވެ، އިތުބާރު ބޮޑުވެގެން ދާނެއެވެ. މި މަޝްރޫޢަކީ ހުޅުމާލޭގެ އާބާދީ އިތުރުވަމުން އަންނަ މިންވަރަށް ބަލައި، ކުރިމަގުގައި ކަރަންޓުގެ ޑިމާންޑް އިތުރުވާނެކަމަށް ލަފާކޮށް ކުރިއަށްގެންދެވޭ މުހިންމު މަސައްކަތެކެވެ.
