މި އަހަރުގެ އޯލެވެލް ގަދަ 10 ގައި ހިމެނުނު ކުދިންގެ ކާމިޔާބީ ފާހަގަކުރުމަށް އަންނަ އޮކްޓޫބަރު މަހުގެ ނިޔަލަށް ޚާއްޞަ ހަފުލާއެއް ބާއްވާނެ ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވެއްޖެއެވެ. މި ކަން އޭނާ ހާމަކުރެއްވީ ދަރުބާރުގޭގައި ބޭއްވުނު "މަތީ އަރުތަވެރިންގެ އިނާމު" ދިނުމުގެ ޖަލްސާގައެވެ.
މި އަހަރުގެ އޭލެވެލްގެ ގަދަ 10 ގައި ހިމެނުނު ކުދިންނަށް އިނާމު ދިނުމަށް ބޭއްވޭ ޖަލްސާއަށް އޯލެވެލްގެ އެއްވަނައިގައި ހިމެނުނު ކުދިންނަށް އެކަނި ދައުވަތު ދީފައިވާ ކަމަށް ބުނެ ސޯޝަލް މީޑިއާގައި ބައެއް ބެލެނިވެރިން ސުވާލު އުފައްދަމުންދާ ކަން މިނިސްޓަރު ފާހަގަކުރެއްވިއެވެ. އެ ކަންބޮޑުވުންތަކަށް އިޝާރާތްކުރައްވަމުން، މިނިސްޓަރު ވިދާޅުވީ ހަފުލާގެ ތައްޔާރީތައް ވަމުންދިޔައިރު އޯލެވެލްގެ ގަދަ 10 ގެ ކާމިޔާބީ ފާހަގަ ނުކުރާނެ ކަމުގެ އަޑުތައް ފެތުރުނު ނަމަވެސް، އެއީ ދޮގު މައުލޫމާތު ކަމަށެވެ.
މިނިސްޓަރު އިތުރަށް ވިދާޅުވީ އެޑިއުކޭޝަން މިނިސްޓްރީގައި އޯލެވެލް ޓޮޕް 10 ފާހަގަކުރުމާ ބެހޭ ގޮތުން ސާފު އަދި ރަނގަޅު ޕޮލިސީއެއް އެކުލަވާލެވިފައިވާ ކަމަށާއި، އެ ޕޮލިސީގައިވާ ގޮތުގެ މަތިން ދަރިވަރުންގެ ކާމިޔާބީތައް ފާހަގަކުރާނެ ކަމަށެވެ.
އޯލެވެލްގެ ގަދަ 10 ގެ ކާމިޔާބީ ފާހަގަކުރުމުގެ ހަފުލާ ބާއްވާނެ ދުވަސް ކަނޑައަޅާނީ ސްކޫލްތަކުގައި މިހާރު ހިނގަމުންދާ އިމްތިހާނުތައް ނިމި، ކުދިންނަށް ދޭ ހަފުތާއެއްގެ ބަންދަށްފަހު ސްކޫލްތައް ހުޅުވުމުން ޕްރިންސިޕަލުންނާއި ޓީޗަރުންގެ މަޝްވަރާއާ އެކުގައި ކަމަށް އޭނާ ވިދާޅުވިއެވެ.
މިނިސްޓަރު އިތުރަށް ފާހަގަކުރެއްވި ގޮތުގައި "މަތީ އަރުތަވެރިންގެ އިނާމު" ދިނުމުގެ ޖަލްސާގައި އޯލެވެލްއިން ދުނިޔޭގެ ފެންވަރުގައި ކާމިޔާބީތައް ހޯދި ދަރިވަރުންނަށް އިނާމު ދިން ނަމަވެސް، އޯލެވެލް ގަދަ 10 ގައި ހިމެނުނު ދަރިވަރުންގެ ކާމިޔާބީ މިނިސްޓްރީގެ އުސޫލުތަކާ އެއްގޮތަށް އަދިވެސް ފާހަގަކުރާނެ ކަމަށެވެ.
މިގޮތުން، އަންނަ އޮކްޓޫބަރު މަސް ނިމުމުގެ ކުރިން އެ ހަފުލާ ބޭއްވޭނެ ކަމުގެ ޔަގީންކަން މިނިސްޓަރު ދެއްވާފައިވެއެވެ.
