މިހާރު ބަޖެޓުން އެހީތެރިކަން ލިބޭ މަދަނީ ޖަމިއްޔާތަކާއެކު ޔޫތު މިނިސްޓްރީން އެއްބަސްވުންތަކުގައި ސޮއިކުރަން ފަށައިފިއެވެ.
މިއަދު ބޭއްވުނު ރަސްމިއްޔާތުގައި، މަދަނީ ޖަމިއްޔާތަކުގެ ރަޖިސްޓްރާ އަލީ ޝަކީލް ވަނީ 10 ޖަމިއްޔާއަކާއެކު އެއްބަސްވުންތަކުގައި ސޮއިކުރައްވާފައެވެ. އަދި މާދަމާ އިތުރު ޖަމިއްޔާތަކާއެކުވެސް ސޮއިކުރުމަށް ވަނީ ހަމަޖެހިފައެވެ.
މިއަދު އެއްބަސްވުމުގައި ސޮއިކުރި ޖަމިއްޔާތަކުގެ ތެރޭގައި ހިމެނެނީ:
1. ތުޅާދޫ ސިލްވާ ޝައިންސް ކްލަބް
2. ގަމު ޒުވާނުންގެ ޖަމިއްޔާ
3. ހުޅުދެލީ އައިލެންޑް ސޯޝަލް އެންޑް ސްޕޯޓްސް އެސޯސިއޭޝަން
4. ސޮސައިޓީ ފޯ ތުނޑީ އެޑްވާންސްމަންޓް އެންޑް ރެކްރިއޭޝަން
5. ޑައިބިޓީސް ސޮސައިޓީ އޮފް މޯލްޑިވްސް
6. ޖަމިއްޔަތުލް ސަލަފް
7. އެސޯސިއޭޝަން ފޯ މަތިވެރި ސްޕޯޓްސް އެންޑް އެވެއާނަސް
8. ދުވާފަރު ޔޫތު މޫވްމަންޓް
9. ޓޮޕްސީ
10. އައިކެންސް އެސޯސިއޭޝަން
ސަރުކާރުން މިދިޔަ މެއި މަހު އިޢުލާންކުރި ގޮތުގައި، ދައުލަތުގެ ބަޖެޓުން ޖަމިއްޔާތަކަށް ފައިސާގެ އެހީ ފޯރުކޮށްދިނުމަށް ނިންމާފައިވަނީ ދެ މައިގަނޑު މަޤްޞަދެއް ހާސިލުކުރުމަށެވެ. އެއީ:
1. މުޖުތަމަޢު ބާރުވެރިކުރުވުމަށް ޖަމިއްޔާތަކުން ކުރާ މަސައްކަތްތަކަށް އެއްބާރުލުން ދިނުން
2. ޤައުމީ ތަރައްޤީގައި ޖަމިއްޔާތަކުން އަދާކުރާ ދައުރު އިތުރަށް ފުޅާކުރުން
މި އެހީތެރިކަމާއެކު، މަދަނީ ޖަމިއްޔާތަކަށް އެ ފަރާތްތަކުގެ މަސައްކަތްތައް އިތުރަށް ފުޅާކޮށް، މުޖުތަމަޢުގެ ތަރައްޤީއަށް އިތުރު ހިއްސާއެއް ކުރެވޭނެއެވެ.
