މާފަންނު ބަސް ޓާމިނަލް ކައިރީގައި މިރޭ ހިނގި ސައިކަލު އެކްސިޑެންޓެއްގައި ތިން މީހަކަށް އަނިޔާވެއްޖެއެވެ.
ފުލުހުންގެ މަޢުލޫމާތު ދީފައިވާ ގޮތުގައި، މި ހާދިސާ ހިނގާފައިވަނީ މިރޭ 6:29 ގައެވެ. އެއީ ދެ ސައިކަލު މުޑި އަރައިގެންނެވެ.
މި އެކްސިޑެންޓުގައި އަނިޔާވި ފަރާތްތަކުގެ ތެރޭގައި ދިވެހި ފިރިހެނަކާއި ދެ ބިދޭސީ ފިރިހެނުން ހިމެނެއެވެ. މި ތިން މީހުންވެސް ފަރުވާ ހޯދުމަށް އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އަށް ގެންދެވިފައިވާ ކަމަށް ފުލުހުން މަޢުލޫމާތު ދެއްވިއެވެ.
އައިޖީއެމްއެޗްގެ މީޑިއާ އޮފިޝަލް ބައެއް މީޑިއާތަކަށް މައުލޫމާތު ދެއްވަމުން ވިދާޅުވީ، އެކްސިޑެންޓުގައި އަނިޔާވި ބިދޭސީ ފަރާތަށް މިވަގުތު އެމަޖެންސީ ރޫމުގައި ފަރުވާ ދެމުންދާ ކަމަށެވެ. އެހެންނަމަވެސް، އަނިޔާވި ފަރާތްތަކަށް ލިބުނު އަނިޔާގެ ތަފްޞީލީ މަޢުލޫމާތު މިވަގުތު ލިބިފައިނުވާ ކަމަށް އެ އޮފިޝަލް ފާހަގަކުރެއްވިއެވެ.
