ކުރީ ސަރުކާރުގެ "ގެދޮރުވެރިޔާ ސްކީމް"ގެ ދަށުން އިމާރާތްކުރަމުންދާ 4000 ހައުސިން ޔުނިޓް ހަވާލު ކުރުމުގެ މަސައްކަތް މަޑުޖައްސާލުމަށް ހައުސިން މިނިސްޓްރީ ވަނީ އަންގާފައިވާކަމަށް ފަހި ދިރިއުޅުން ކޯޕަރޭޝަންއިން ބުނެފިއެވެ.
އެކޯޕަރޭޝަނުން ނެރުނު ބަޔާނެއްގައި ބުނެފައިވަނީ، 4000 ހައުސިން ޔުނިޓްތައް ހަވާލުކުރުމާބެހޭ މައުލޫމާތު ހޯދުމަށް ގިނަ ފަރާތްތަކުން ހުށަހަޅަމުންދަ ކަމަށާއި، އެހެންނަމަވެސް "ގެދޮރުވެރިޔާ ސްކީމް"ގެ ދަށުން ޔުނިޓްތައް ލިބޭ ފަރާތްތަކާއި އެފަރާތްތަކަށް ލިބޭނެ ޔުނިޓެއް ކަނޑައެޅުމުގެ މަސައްކަތަކީ ހައުސިން މިނިސްޓަރީން ކުރިޔަށް ގެންދާ މަސައްކަތެއް ކަމުގައެވެ. އެހެންކަމުން ޔުނިޓްތައް ހަވާލުކުރުމާއި ގުޅޭ އެންމެހާ ކަންތައްތަކެއް އެ ކޯޕަރޭޝަންއިން ކުރިޔަށް ގެންދާނީ ހައުސިން މިނިސްޓްރިން އަންގާ ގޮތެއްގެ މަތިން ކަމަށް ފަހި ދިރިއުޅުން ކޯޕަރޭޝަންގެ ބަޔާނުގައި ބުނެފައި ވެއެވެ.
އެ ކޯޕަރޭޝަންއިން ބުނެފައިވަނީ، އެހެންކަމުން 4000 ހައުސިން ޔުނިޓް ހަވާލު ކުރުމުގެ އެންމެހާ މަސައްކަތްތަކެއް ކުރިޔަށް ގެންދާނީ އެކަމާއި ގުޅޭގޮތުން މިނިސްޓްރީން ވަކިގޮތެއް ނިންމުމުން ކަމުގައެވެ.
