މިދިޔަ ހަފްތާގައި ރާއްޖެއަށް ކުރި ގަދަ ވިއްސާރައިގެ ސަބަބުން ގެދޮރަށް ލިބުނު ގެއްލުމާ ގުޅިގެން، މިވަގުތު ދެ އާއިލާއަކުން ޖުމްލަ 10 މީހުން އަދިވެސް ވަގުތީ ހިޔާވަހިކަމުގައި ދިރިއުޅެމުންދާ ކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީގެ (އެންޑީއެމްއޭ) ޗީފް އެގްޒެކެޓިވް ހިސާން ހަސަން ވިދާޅުވެއްޖެއެވެ.
ޕީއެސްއެމް ނިއުސްގެ "ރާއްޖެމިއަދު" ޕްރޮގްރާމްގައި ވާހަކަދައްކަވަމުން ހިސާން ހަސަން ވިދާޅުވީ، ވިއްސާރައިގެ ސަބަބުން ފުރަތަމަ ވަގުތީ ހިޔާވަހިކަން ފޯރުކޮށްދިނީ ފަސް އާއިލާއަކަށް ކަމަށެވެ. މިއީ ދިރިއުޅެން ނުކުޅެދޭ ވަރަށް ގޭގެއަށް ގެއްލުން ލިބުނު އާއިލާތަކެވެ.
"އާންމު ހާލަތަށް އައުމުން އެ މީހުން އާންމު ދިރިއުޅުމަށް ރުޖޫޢަ ކުރެވޭނެ," ހިސާން ހަސަން ވިދާޅުވިއެވެ.
ވިއްސާރައިގެ ސަބަބުން ލިބުނު ގެއްލުންތައް ދެނެގަތުމަށް އެންޑީއެމްއޭއިން މިހާރު ދަނީ އެސެސްމަންޓް ހެދުމުގެ މަސައްކަތް ކުރަމުންނެވެ. މި އެސެސްމަންޓުން ވިއްސާރައިގެ ސަބަބުން ގެއްލުން ލިބުނު މިންވަރާއި، އެހީ ބޭނުންވާ ދާއިރާތައް ދެނެގަނެވޭނެ ކަމަށް ބެލެވެއެވެ.
