ރަޝިޔާ-ޔޫކްރެއިން ހަނގުރާމައިގެ ސަބަބުން ރަޝިޔާގެ ކަރސްކް ސަރަޙައްދަށް ކުރިމަތިވެފައިވާ ނުރައްކަލާ ގުޅިގެން، އެ ސަރަޙައްދުގައި ދިރިއުޅޭ އަދި ދަތުރުފަތުރުކުރާ ދިވެހިންގެ ރައްކާތެރިކަމަށް ޚާއްޞަ ސަމާލުކަމެއް ދިނުމަށް ސަރުކާރުން އިލްތިމާސްކޮށްފިއެވެ.
މިނިސްޓްރީ އޮފް ފޮރިން އެފެއާޒުން ނެރުނު ބަޔާނެއްގައި ބުނެފައިވަނީ، މިހާރު އެ ސަރަޙައްދުގައި ތިބި ދިވެހި ކިޔަވާ ކުދިންގެ ހާލު ވަރަށް ގާތުން ބަލަމުންދާ ކަމަށެވެ. އަދި މިނިސްޓްރީގެ އިތުރުން ޖަރުމަނުވިލާތުގައި ހުންނަ ދިވެހިރާއްޖޭގެ އެމްބަސީން ވެސް މި މަސައްކަތުގައި ބައިވެރިވަމުންދާކަން ފާހަގަކޮށްފައިވެއެވެ.
"މި ދަނޑިވަޅުގައި، އެ ސަރަޙައްދުގައި ދިރިއުޅުއްވާ އަދި ދަތުރުފަތުރު ކުރައްވާ އެންމެހައި ދިވެހި ރައްޔިތުން އަމިއްލަ ރައްކާތެރިކަމާއި ސަލާމަތްތެރިކަމަށް ޚާއްޞަ އަހައްމިއްޔަތުކަމެއް ދެއްވުމަށް އިލްތިމާސްކުރަމެވެ،" މިނިސްޓްރީގެ ބަޔާނުގައި ވެއެވެ.
އިތުރު އެހީތެރިކަމެއް ބޭނުންވާ ފަރާތްތަކަށް ޖަރުމަނުވިލާތުގައި ހުންނަ ދިވެހިރާއްޖޭގެ އެމްބަސީއާ ގުޅުމަށް ވެސް ސަރުކާރުން އިރުޝާދު ދީފައިވެއެވެ. އެމްބަސީއާ ގުޅޭނެ ފޯނު ނަންބަރުތަކަކީ:
– ފޯން: 49+ 17 129 164 61
– ހޮޓްލައިން: 49+ 30 200 738 60
މި ޙާލަތާ ގުޅޭ އިތުރު މަޢުލޫމާތު ލިބުމުން ޢާންމުކުރާނެ ކަމަށް ސަރުކާރުން ބުނެފައިވެއެވެ.
