އާދީއްތަ ދުވަހުން ފެށިގެން ކުރިއަށް އޮތް 5 ދުވަހު މޫސުން ގޯސްވާނެ ކަމަށް ލަފާކުރެވޭތީ، ރައްކާތެރިކަމުގެ ފިޔަވަޅުތައް އެޅުމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ވަނީ އިލްތިމާސްކޮށްފައެވެ.
އެންޑީއެމްއޭއިން މަޢުލޫމާތު ދެމުން ބުނީ، މޫސުމާބެހޭ ޤައުމީ އިދާރާއިން ދީފައިވާ މަޢުލޫމާތުގެ މައްޗަށް ބިނާކޮށް، އާދީއްތަ ދުވަހުން ފެށިގެން 5 ދުވަހުގެ މުއްދަތަށް މޫސުން ގޯސްވާނެ ކަމަށް ލަފާކުރެވޭ ކަމަށެވެ. މި މުއްދަތުގައި ގުގުރުމާއެކު ބޯކޮށް ވާރޭވެހި، ވިލާގަނޑުގައި ގަޑިއަކު 40 އާއި 45 މޭލުގެ ދެމެދުގެ ބާރުމިނުގައި ވައިޖެހޭނެ ކަމަށާއި، ކަނޑުތައްވެސް ގަދަވާނެ ކަމަށް ލަފާކުރެވޭ ކަމަށް އެންޑީއެމްއޭއިން ހާމަކުރިއެވެ.
މި ހާލަތާ ގުޅިގެން، އާންމު ރައްޔިތުންގެ މުދަލާއި ގެދޮރަށް ލިބިދާނެ ގެއްލުމަކުން ސަލާމަތްވުމަށްޓަކައި ރައްކާތެރިކަމުގެ ފިޔަވަޅުތައް އެޅުމަށް އެންޑީއެމްއޭއިން ވަނީ އިލްތިމާސްކޮށްފައެވެ. މިގޮތުން އެޅިދާނެ ބައެއް ފިޔަވަޅުތަކުގެ ތެރޭގައި:
1. ފެންބޮޑުވުމަށް ތައްޔާރުވުން
2. ގެއަށް ފެން ނުވަންނާނެހެން ފިޔަވަޅު އެޅުން (މިސާލަކަށް ދޮރުމަތީގައި ވެލިބަސްތާ ޖެހުން)
3. ގޭތެރޭގައި ފެންބޮޑުވެއްޖެނަމަ ގެއްލުންވެދާނެ މުދާ އުސްތަންތަނަށް ބަދަލުކުރުން
4. ގަދަވައިގައި ފުރާޅު ނުއެއްލާނެހެން ވައު ފަދަ އެއްޗެހިން ހައްޔަރުކުރުން
5. ގަދަވައިގައި އެއްލާލަފާނެ ތަކެތި ބަނދެ ރައްކާތެރިކުރުން
6. ބޭނުން ނުކުރާ ކަރަންޓު އާލާތްތައް ނިއްވާލުން
7. ކަނޑުދަތުރުފަތުރުގައި މޫސުމަށް ސަމާލުވެ، މުވާސަލާތީ ވަސީލަތްތައް ޔަޤީންކުރުން
8. ދަތުރުފެށުމުގެ ކުރިން އެންމެ ފަހުގެ މޫސުމުގެ މަޢުލޫމާތު ހޯދުން
9. ކާޑުގެ ބާވަތްތަކާއި އަސާސީ ބޭނުންތަކުގެ ތަކެތި ދަތިނުވާނެހެން އިންތިޒާމުކުރުން
ހިމެނެއެވެ.
މޫސުމާބެހޭ ޤައުމީ އިދާރާއިން ވެސް ވަނީ އާދީއްތަ ދުވަހުން ފެށިގެން ރާއްޖޭގެ ސަރަޙައްދުގައި ހުޅަނގު މޫސުމުގެ ބާރު ގަދަވާނެ ކަމަށް ލަފާކުރެވޭތީ، ހުރިހާ ފަރާތްތަކުންވެސް މޫސުމަށް ޚާއްޞަ ސަމާލުކަމެއް ދިނުމަށް އިލްތިމާސްކޮށްފައެވެ.
