15 އަހަރުގެ ދިގު ވެރިކަމަކަށްފަހު، ބަންގްލަދޭޝްގެ ކުރީގެ ބޮޑުވަޒީރު ޝެއިޚް ހަސީނާ އުސްތިއުފާ ދެއްވާ، ފިލައިގެން ދިޔުމަށް ފަހު، ނޯބަލް އިނާމު ލިބިވަޑައިގެންފައިވާ މައިކްރޯފައިނޭންސްގެ ތަޖިރިބާކާރު، ޑރ. މުހައްމަދު ޔޫނުސް އެގައުމުގެ ވަގުތީ ސަރުކާރުގެ އިސްވެރިޔާގެ މަގާމު ފުރުއްވާނެ ކަމަށް ރިޔާސީ ގަނޑުވަރުން މިއަދު އިއުލާނުކޮށްފިއެވެ.
މި ނިންމުން ނިންމާފައިވަނީ ރައީސުލްޖުމްހޫރިއްޔާ މުހައްމަދު ޝަހާބުއްދީން، ސިފައިންގެ އެންމެ އިސްވެރިން އަދި ދަރިވަރުންގެ ލީޑަރުންނާއެކު ބޭއްވުނު ބައްދަލުވުމެއްގައެވެ. "ޕްރޮފެސަރ ޑރ. މުހައްމަދު ޔޫނުސްގެ ބެއްލެވުމުގެ ދަށުން ވަގުތީ ސަރުކާރެއް އުފެއްދުމަށް ނިންމައިފި،" ކަމަށް ރައީސް އޮފީހުން ނެރުނު ބަޔާނެއްގައި ބުނެފައިވެއެވެ.
84 އަހަރުގެ ޔޫނުސް އަކީ ބަންގްލަދޭޝްގެ މިލިއަނުން ގުނާލެވޭ މީހުން ފަގީރުކަމުން ސަލާމަތްކުރުމަށް އެހީތެރިވެދެއްވި ބޭފުޅެކެވެ. މިހާރު އޭނާ ހުންނެވީ ޔޫރަޕްގައެވެ. އޭނާ އޭއެފްޕީއަށް ވިދާޅުވެފައިވަނީ ވަގުތީ ސަރުކާރު ހިންގުމަށް ތައްޔާރަށް ހުންނެވި ކަމަށެވެ.
ޝެއިޚް ހަސީނާ (76 އަހަރު) ވަނީ ހޯމަ ދުވަހު މަގާމުން އިސްތިއުފާ ދެއްވާފައެވެ. 2009 ވަނަ އަހަރުން ފެށިގެން ވެރިކަމުގައި ހުންނެވި ހަސީނާގެ މައްޗަށް ޖެނުއަރީ މަހު ބޭއްވުނު އިންތިޚާބު ވަގަށް ނަގާފައިވާ ކަމަށާއި އަދި އިންސާނީ ޙައްގުތަކަށް ފުޅާ ދާއިރާއެއްގައި އަރައިގަނެފައިވާކަމުގެ ތުހުމަތު އުފުލިފައިވެއެވެ.
މުޒާހަރާތައް ފެށިގެން ދިޔައީ ސަރުކާރުގެ ވަޒީފާތަކުގައި ކޯޓާ ކަނޑައެޅުމުގެ މައްސަލައަކާ ގުޅިގެންނެވެ. ނަމަވެސް އެއީ ފަހުން ހަސީނާއާ ދެކޮޅު ހަރަކާތަކަށް ބަދަލުވިއެވެ. މުޒާހަރާތައް މަޑުޖައްސާލުމަށް ސަލާމަތީ ބާރުތައް މަގުމައްޗަށް ނެރުނު ނަމަވެސް، ސިފައިން ފަހުން ވަނީ ހަސީނާއާ ދެކޮޅު ހަދާފައެވެ. އެންމެ ފަހުން ހަސީނާ ވަނީ ހެލިކޮޕްޓަރަކުން އިންޑިއާއަށް ފިލައިގެން ދާން މަޖުބޫރުވެފައެވެ.
ބަންލާދޭޝްގެ ރައީސް ވަނީ އާދީއްތަ ދުވަހު ޕާލިމަންޓް އުވާލައްވާފައެވެ. އަދި ކުރީގެ ބޮޑުވަޒީރު އަދި ބީއެންޕީގެ ޗެއަރޕާސަން ޚާލިދާ ޒިޔާ (78 އަހަރު) ވަނީ އަހަރުތަކެއް ވަންދެން ގޭ ބަންދުގައި ބެހެއްޓުމަށްފަހު މިނިވަންކޮށްދެއްވާފައެވެ.
ވޭތުވެދިޔަ ދެ ދުވަހުގެ ތެރޭގައި މަދުވެގެން 432 މީހުން މަރުވެފައިވާކަމަށް އޭއެފްޕީގެ ހިސާބުތަކުން ދައްކައެވެ. މުޒާހަރާކުރި ފަރާތްތަކުން ވަނީ ޕާލިމަންޓަށް ވަދެ، ޓީވީ ސްޓޭޝަންތަކަށް އަލިފާން ޖަހާފައެވެ. އަދި ބައެއް މީހުން ވަނީ ހަސީނާގެ ބައްޕަ، ބަންގްލަދޭޝްގެ މިނިވަންކަމުގެ ބަޠަލު ޝެއިޚް މުޖީބުރް ރަޙްމާންގެ ބުތްތައް ތަޅާލާފައެވެ.
ބަންގްލަދޭޝްގެ އިންސާނީ ޙައްޤުތަކާބެހޭ ޖަމާޢަތްތަކުންނާއި، އެމެރިކާ އަދި ޔޫރަޕިއަން ޔޫނިއަންގެ ޑިޕްލޮމެޓުން ވަނީ ދީނީ، އިރުގީ އަދި އެހެނިހެން މައިނޯރިޓީ ގްރޫޕްތަކަށް ހަމަލާ ދެވިފައިވާކަމުގެ ރިޕޯޓުތަކާމެދު ކަންބޮޑުވުން ފާޅުކޮށްފައެވެ.
ހަމަ އެއާއެކުބަންގްލަދޭޝްގެ އަވައްޓެރި އަދި މުހިންމު ސަރަހައްދީ ބައިވެރިންކަމުގައިވާ އިންޑިއާ އަދި ޗައިނާއިން ވަނީ ހަމަޖެހުމަށް ގޮވާލާފައެވެ.
