ޒުވާން ހަތީބުންގެ ޕްރޮގްރާމުގެ ދެވަނަ ބުރުގައި ބައިވެރިވުމަށް 206 މީހުން އެޕްލިކޭޝަން ހުށަހަޅާފައިވާ ކަމަށް އިސްލާމިކް މިނިސްޓްރީން ބުނެފިއެވެ.
ޒުވާން ހަތީބު ޕްރޮގްރާމަކީ ގްރޭޑް 10، 11 އަދި 12 ގައި އުޅޭ ދަރިވަރުންނަށާއި ސްކޫލް ނިމިފައިވާ ދަރިވަރުންނަށް ހުކުރުކުރުމުގެ ހުއްދަ ދިނުމަށް ޓަކައި އިންތިޒާމުކުރެވިފައިވާ ޕްރޮގްރާމެކެވެ.
އިސްލާމިކް މިނިސްޓްރީން ބުނީ އެ ޕްރޮގްރާމްގެ ދެވަނަ ބުރަށް ހުޅުވާލުމުން 206 ފޯމް ހުށަހަޅާފައިވާ ކަމަށެވެ. އިސްލާމިކް މިނިސްޓްރީން ބުނި ގޮތުގައި ދެވަނަ ބުރުގެ އިމްތިހާނު ތިން ސަރަހައްދެއްގައި ބާއްވާނެއެވެ. އެއީ މާލެ ސިޓީ އާއި އައްޑޫ ސިޓީ އަދި މ. އަތޮޅުގައެވެ.
ޒުވާން ހަތީބުން ތަމްރީންކުރުމުގެ ފުރަތަމަ ބުރުގައި 100 އަށް ވުރެ ގިނަ ކުދީން ވަނީ ސަނަދު ހާސިލްކޮށްފައެވެ. އެ ޕްރޮގްރާމްގެ ތެރެއިން ހަތީބުންނަށް ހުތުބާ ކިޔުމަށާއި އިމާމުވެނަމާދު ކުރުމަށާއި ދީނާ ގުޅުން ހުރި އެހެނިހެން ހާއްސަ ތަމްރީނުތަކެއް ދޭނެއެވެ.
މި ޕްރޮގްރާމްގެ ސަބަބުން ހަތީބުން މަދު ރަށްރަށުގެ ކައުންސިލްތަކަށް ވެސް ބޮޑު ލުއިފަސޭހައެއް ލިބޭނެ ކަމަށް މިނިސްޓްރީން ބުންޏެވެ.
