އެމްއެމްޕީއާރުސީގެ ޑެޕިޔުޓީ މެނޭޖިން ޑިރެކްޓަރު މުހައްމަދު ބައްސާމް އާދަމް މަގާމުން ވަކިކުރުމަށް އެކުންފުނީގެ ބޯޑުން ނިންމައިފިއެވެ.
އެނގިފައިވާ ގޮތުގައި ޑީއެމްޑީ ބައްސާމް މަގާމުން ވަކިކުރަން ނިންމީ އިއްޔެ ބޭއްވި އެ ކުންފުނީގެ ބޯޑު ބައްދަލުވުމުގައެވެ.
ބައްސާމް މަގާމުން ވަކިކޮށްފައި ވާއިރު، އެ ކުންފުނީގެ އަންހެން މުވައްޒަފަކަށް ޖިންސީ ފުރައްސާރަ ކުރިކަމުގެ ތުހުމަތުގައި މީގެކުރިން އޭނާވަނީ ސަސްޕެންޑު ވެސް ކޮށްފައެވެ. ނަމަވެސް އޭނާ ފަހުން ވަނީ އަލުން ވަޒީފާއަށް ނެރެފަ އެވެ. އަދި އެކުންފުނީގެ އެމްޑީކަމުގެ މަގާމުގައި ހުންނެވި ފާތިމަތު ތައުފީގު (ކުޑީ) މަގާމުން ވަކިކުރުމުން، އެ ކުންފުނި ހިންގުމާއި ހަވާލުވެ ހުރީވެސް ބައްސާމްއެވެ. އެނާ ކުންފުނި ހިންގުމާއި ހަވާލުވެ ހުރީ އިބްރާހިމް ޝިއުރީ އެކުންފުނީގެ އާ އެމްޑީއަކަށް ހަމަޖައްސަން ދެނެވެ.
މައުލުމާތު ލިބިފައިވާ ގޮތުގައި، ބައްސާމްގެ އިތުރުން އެމްއެމްޕީއާރުސީގެ އިދާރީ މަގާމެއްގައި ހުންނެވި އިބްރާހިމް އާސިމް (އައިބީ)ވެސް ވަނީ މަގާމުން ވަކިކޮށްފައެވެ. އޭނާ ހުރީ ކުންފުނީގެ ޑިރެކްޓަރެއްގެ މަގާމުގައެވެ. އަދި އޭނާއަކީ އެކުންފުނީގެ އެންމެ ދުވަސްވީ އެއް މުވައްޒަފެވެ.
ބައެއް މީޑިއާތަކަށް އޭނާ މައުލުމާތު ދީފައިވާ ގޮތުގައި މަގާމުން ވަކިކުރި ސަބަބެއް އޭނާއަށް އަންގާފައެއް ނުވެއެވެ. ބައްސާމް މަގާމުން ވަކިކޮށްފައިވާކަން އޭނާ އަދި ޔަގީން ކޮށްދީފައެއް ނުވެއެވެ.
މީގެ ކުރިން، އެމްއެމްޕީއާރުސީގެ ބޯޑުގެ ޗެއަރމަންއަކަށް ހުންނެ ނޫރައިން ވަނީ އަމިއްލަފުޅަށް މަގާމުން އިސްތިއުފާ ދެއްވާފައެވެ.
