މޭ މަހުގެ 9 ވަނަ ދުވަަހުން ފެށިގެން މިބިމުގައި ގާއިމުވެގެން ބޭރުގެ އެއްވެސް ސިފައިންގެ މީހަކު ނެތްކަމުގައި ޑިފެންސް މިނިސްޓަރ ޣައްސާން މައުމޫން ވިދާޅުވެއްޖެއެވެ.
މިރޭ ޕީއެންސީގެ ހަރުގޭގައި ބޭއްވުނު ޖަގަހަ ޖަލްސާގައި ވާހަކަ ދައްކަވަމުން ޢައްސާން މައުމޫން ވިދާޅުވީ އިންޑިއާ ސިފައިން ރާއްޖެއިން ފައިބައިގެން ގޮސްފައިވަނީ ދިވެހިންނަށް އެއްވެސް ގެއްލުމެއް ނުވާނެ ގޮތަށް ރައީސް ކުރެއްވި މަސައްކަތްޕުޅުގެ ނަތީޖާއެއްގެ ގޮތުންނެވެ. އަދި ރައީސް މުއިއްޒުއަށް ޝުކުރު އަދާކުރައްވަމުން، ގައްސާން ވިދާޅުވީ މިނިވަންކަމާއި އިސްތިގުލާލުގެ ދިފާއުގައި ރައީސް ފެއްޓެވި ދެވަނަ މަސައްކަތަކީ ދިވެހި ސިފައިންގެ ގާބިލުކަން އިތުރުކުރުން ކަމުގައެވެ.
ރައީސުލްޖުމްހޫރިއްޔާ އިސްކުރެއްވި މާތް ހިކުމަތުން، މާތްﷲގެ ހެޔޮ ރަހުމަތްފުޅާއެކު މިދިޔަ މޭ މަހުގެ 9 ވަނަ ދުވަަހުން ފެށިގެން މިބިމުގައި ގާއިމުވެގެން ބޭރުގެ އެއްވެސް ސިފައިންގެ މީހަކު، އިންޑިއާ އެއްވެސް ސިފައިންގެ މީހަކު ނެތް.
މިރޭގެ ޖަލްސާގައި ގައްސާން މައުމޫން ވިދާޅުވީ، ރައީސް މުއިއްޒު ވެރިކަމާއި ހަވާލުވެވަޑައިގަތުމަށްފަހު އެންމެ ފުރަތަމަވެސް ރައީސް ކުރެއްވި މަސައްކަތްޕުޅަކީ ރާއްޖޭގައި ތިބި އިންޑިއާ ސިފައިންގެ އަދަދު ދެނެވަޑައިގަތުން ކަމަށާއި، އެއަށްފަހު ދިވެހި ދައުލަތުގެ އެންމެ އިސް ޑިޕްލޮމެޓުގެ ހައިސިއްޔަތުން ޑިޕްލޮމެސީގެ އުސޫލުން އިންޑިއާ ސިފައިން ރާއްޖެއިން ފޮނުވައިލުމަށް ކަމަށެވެ.
