މ. އެންޒިއަންގޭގެ 3 ވަނަ ފަންގިފިލާގައި މިއަދު ހިނގި އަލިފާނުގެ ހާދިސާގައި ދުމުގެ އަސަރުކޮށްގެން ހާލުގައި ޖެހުނު 4 މީހަކަށް ނެޝަނަލް ޑިޒާސްޓަރ މެނޭޖްމަންޓް ސެންޓަރުން ވަގުތީ ބޯހިޔާވަހިކަން ފޯރުކޮށްދީފިއެވެ.
ނެޝަނަލް ޑިޒާސްޓަރ މެނޭޖްމަންޓް ސެންޓަރުން ބުނެފައިވަނީ މި ހާދިސާއާއި ގުޅިގެން ހަތަރު މީހަކަށް ފަނަރަ ދުވަހުގެ މުއްދަތަށް ބޯހިޔާވަހިކަން ފޯރުކޮށްދެވިފައިވާކަމަށެވެ.
އެމްއެންޑިއެފްއިން ބުނެފައިވަނީ މިހާދިސާގައި 4 މީހަކު ހޮސްޕިޓަލަށް ގެންގޮސް ފަރުވާ ދީފައިވާއިރު، އޭގެ ތެރެއިން އެކެއްގެ ހާލު ސީރިއަސްވެ އައިސީޔޫގައި ފަރުވާދޭން ފަށާފައިވާ ކަމުގައެވެ. އައިޖީއެމްއެޗް މީޑިއާ އޮފިޝަލް ވިދާޅުވެފައިވަނީ ދެން ތިބި މީހުންނަށް ފަރުވާ ދީފައިވަނީ އެމަޖެންސީގައި ކަމުގައެވެ.
އެމްއެންޑީއެފްއިން ބުނެފައިވަނީ، އަލިފާން ނިއްވާލެވުނުއިރު މި ހާދިސާގައި، ދުމުގެ އަސަރުކޮށްގެން 4 މީހަކު ހޮސްޕިޓަލަށް ގެންދެވުނު ކަމަށެވެ. އަދި މިހާދިސާގައި މ. އެންޒިއަންގޭގެ 3 ވަނަ ފަންގިފިލާގައި ހުރި ގިނަ ޢަދަދެއްގެ ތަކެއްޗަށް ވަނީ ބޭނުންނުކުރެވޭވަރަށް ގެއްލުން ލިބިފައި ކަމުގައެވެ.
އަލިފާން ރޯވިތާ މާގިނައިރުތަކެއް ނުވެ ސިފައިން އެ އަލިފާން ކޮންޓްރޯލް ކޮށްފައިވެއެވެ.
