ޗައިނާގެ ނަންޗަން ސިޓީގައި ކުރިއަށްދާ "ޝަންހާއި ކޯޕަރޭޝަން އޯގަނައިޒޭޝަން ފޯރަމް އޮން ޓްރެޑިޝަނަލް މެޑިސިން" ގައި ހެލްތު މިނިސްޓަރު ޑރ. އަބްދުﷲ ހަލީލު ބައިވެރިވަޑައިގެންފިއެވެ.
ރަސްމީ ދަތުރެއްގައި ހަލީލް ޗައިނާ އަށް ވަޑައިގެންފައިވާ އިރު، އެ ފޯރަމްގެ ރިޔާސަތު ވެސް ބަލަހައްޓަވާފައި ވަނީ ހަލީލެވެ.
މި ބައްދަލުވުމުގައި ފޯރަމްގައި ބައިވެރިވި ގައުމުތަކުގެ މެދުގައި ގުޅުން އިތުރަށް ބަދަހިކޮށް ގަދީމީ ބޭސްވެރިކަމުގެ އުސޫލުތައް ހަރުދަނާ ކުރުމަށް ގައުމުތަކުގެ އެއްބާރުލުން ދިނުމާއި ގުޅޭ ގޮތުން މަޝްވަރާ ކުރިއެވެ.
ފޯރަމް ހުޅުވުމުގެ ރަސްމިއްޔާތުގައި މިނިސްޓަރު ދެއްކެވި ވާހަކައިގައި މިހާރުގެ ޒަމާނީ ޞިއްޙީ ފަރުވާގެ ތެރެއަށް ގަދީމީ ބޭސްވެރިކަން ބޭނުން ކުރުމުގެ މުހިންމު ކަމަށް އަލިއަޅުއްވާލެއްވިއެވެ.
މިނިސްޓަރުގެ މި ޗައިނާ ދަތުރުގައި އެފިލިއޭޓެޑް ހޮސްޕިޓަލް އޮފް ޖިއަންޝީ ޔުނިވަސިޓީ އޮފް ޗައިނީސް މެޑިސިން އަށް ޒިޔާތަރްކުރައްވާފައިވެއެވެ. އެ ޒިޔާރަތުގައި ތަނުން ދޭ ހިދުމަތާއި، ސިއްހީ ހިދުމަތް ދޭ ގޮތާއި އެތަނުން ދޭ ހިދުމަތްތައް މިނިސްޓަރު ބައްލަވާލެއްވިއެވެ.
