އިސްރާއީލަށް އެހީތެރިކަން ފޯރުކޮށްދެމުންދާނަމަ، ސައިޕްރަސްއަށް ހަމަލާ ދޭނެކަމުގެ އިންޒާރު ލުބުނާންގެ ހިޒްބުﷲއިން ދީފިއެވެ.
އިސްރާއީލު ސިފައިންނާއި ލުބްނާންގެ ހިޒްބުﷲ ޖަމާއަތާ ދެމެދު ބޮޑު ހަނގުރާމައެއް ހިނގައްޖެނަމަ ސައިޕްރަސްގެ ވައިގެ ބަނދަރުތައް ބޭނުންކުރުމުގެ ހުއްދަ ދީފިނަމަ އެގައުމަށް ހަމަލާދޭނެކަމުގެ އިންޒާރު ހިޒްބުاللهގެ ވެރިޔާ ހަސަން ނަސްރުالله ވަނީ ސައިޕްރަސްއަށް ދީފައެވެ.
"ލުބްނާނަށް އަމާޒުކޮށް ސައިޕްރަސްގެ އެއާޕޯޓުތަކާއި ބޭސްތައް އިޒްރޭލަށް ހުޅުވާލުމަކީ ހަނގުރާމައިގައި ސައިޕްރަސް ގެ ސަރުކާރު ބައިވެރިވުން،" ހިޒްބުاللهގެ އިސް ބޭފުޅަކާއި ތިން ހަނގުރާމަވެރިން މިދިޔަ ހަފުތާގައި ޝަހީދުވުމާއި ގުޅިގެން ދެއްވި ތަގުރީރުގައި ނަސްރުالله ވިދާޅުވި އެވެ.
އޭނާ ވިދާޅުވި ގޮތުގައި އިސްރާއީލުން ކޮންމެ އަހަރަކު ވެސް ސައިޕްރަސްގައި އަސްކަރީ ތަމްރީނުތައް ކުރިއަށް ގެންދެ އެވެ. ނަޞްރަالله ވަޢުދުވެވަޑައިގަތީ ހިޒްބުالله އިން އިސްރާއީލާ ދެކޮޅަށް "އެއްވެސް ލިމިޓެއް ނެތި" އަދި "އެއްގަމާއި ވައިގެ މަގުންނާއި ކަނޑުގެ މަގުން" ހަނގުރާމަ ކުރާނީ ހުޅުވާލެވިފައިވާ ހަނގުރާމައަކަށް މިހާރު ކުރިޔަށްދާ ހަމަލާތައް ބަދަލުވެގެން ހިގައްޖެނަމަ ކަމަށެވެ.
އޭނާ ވިދާޅުވީ އިސްރާއީލަށް އެގައުމުގެ އެއާޕޯޓުތައް ބޭނުންކުރުމުގެ ހުއްދަ ދީފިނަމަ ސައިޕްރަސްއިން ހިޒްބުالله އާއި ހަނގުރާމަކުރަމުންދާ ކަމަށް ދެކޭނެ ކަމަށެވެ.
ސައިޕްރަސްއަކީ އިސްރާއީލުގެ އަސްކަރިއްޔާއަށް އެއްވެސް ބިމެއް ނުވަތަ ބޭސް ފެސިލިޓީއެއް ފޯރުކޮށްދޭ ގައުމެއްކަމަށް އެނގިފައި ނުވި ނަމަވެސް މީގެ ކުރިން ސައިޕްރަސްގެ ވައިގެ ސަރަހައްދު ކަމަށްވާ ފްލައިޓް އިންފޮމޭޝަން ރީޖަން (އެފްއައިއާރު) ބޭނުންކޮށްގެން ބައެއް ފަހަރު ވައިގެ ޑްރިލްތައް ކުރިއަށް ގެންދިއުމުގެ ހުއްދަ އެގައުމުން ދީފައިވެއެވެ. ނަމަވެސް ހަމަނުޖެހުންތަކުގައި އެގައުމުގެ ސަރަހައްދު ބޭނުންކުރުމުގެ ހުއްދަ ދުވަހަކުވެސް ދީފައި ނުވާނެކަމަށް ސައިޕްރަސްއިން ބުނެފައި ވެއެވެ.
ހިޒްބުالله ޖަމާއަތާއި އިސްރާއީލު ސިފައިން ލުބުނާނުގެ ބޯޑަރު ހުރަސްކޮށް ކޮންމެ ދުވަހަކު ވެސް ބަޑީގެ ހަމަލާތައް ބަދަލުކުރަމުން ދަނީ ޣައްޒާގައި އެ ޖަމާއަތުގެ ބައިވެރިޔާ ހަމާސް އަށް ތާއީދުކޮށް ލުބްނާން ޖަމާއަތުން ފްރޮންޓެއް ހުޅުވުމާ ގުޅިގެންނެވެ.
ފާއިތުވި ހަފުތާތަކުގައި ލުބްނާނާއި އިސްރާއީލުގެ ބޯޑަރު ސަރަހައްދުގައި ހިނގަމުންދާ ހަމަނުޖެހުންތައް އިތުރުވެ، ބޮޑު ވެސް ހަނގުރާމައެއް ހިނގައިދާނެ ކަމުގެ ބިރު ވަނީ ބޮޑުވެފަ އެވެ.
