އަރަފާތު ދުވަހު އިސްލާމީ އުއްމަތް ދައްކައިދެނީ އެއްބައިވަންތަ ކަމުގެ މަތިވެރި މަންޒަރު ކަމުގައި މިއަދުގެ ހުކުރު ޚުޡުބާގައި ވިދާޅުވެއްޖެއެވެ.
"ޢަރަފާތު ދުވަސް" މިމައުޟޫއަށް ޚާއްސަ ކުރެވިގެންދިޔަ މިއަދު ހުކުރު ޚުޡުބާގައި ވިދާޅުވީ ކުލަ ތަފާތު ނަމަވެސް، ނަސްލު ތަފާތު ނަމަވެސް ވާހަކަ ދައްކާ ބަހުރުވަ ތަފާތު ނަމަވެސް، މުސްލިމުން އެއްތާކަށް އެއްކުރުވަނީ އީމާންކަން ކަމުގައެވެ.
މިއަދު ހުކުރު ޚުޡުބާގައި ވިދާޅުވީ ހުރިހާ މުސްލިމުން އެއްތަން ކުރުވަނީ މާތް ﷲގެ އެއްކައުވަންތަކަމަށް ގޮވާލާ އިސްލާމްދީން ކަމުގައެވެ.
އެ އެންމެން އެއްތާކަށް، އެއް ގޮތަކަށް އެއްވެ، މާތް ﷲއަށް މުނާޖާ ދެންނެވުމަށްޓަކައެވެ. އަރަފާތު ދުވަހު އަރަފާތު ބިމުގައި ތިބެ މާތްﷲއަށް ތަލްބިޔާ ކިޔުމަށެވެ. އެތައް ހާސް އަހަރެއް ކުރީން އިބުރާހީމް އަލައިހިއްސަލާމް ގޮވާލެއްވި ގޮވައިލެއްވުމަށް އިޖާބަދިނުމުގެ ގޮތުންނެވެ.
މިއަދުގެ ޚުޡުބާގައި ވިދާޅުވެފައި ވެއެވެ.
ޚުޡުބާގައި ވިދާޅުވީ މުސްލިމުން އަރަފާތު ބިމުގައި ތިބޭ މަންޒަރަކީ ޝައުގުވެރިކަމާއެކު، މީސްތަކުންގެ ކަޅި އެދިމާއަށް އަނބުރައިލެވޭ މަންޒަރެެއް ކަމަށާއި، ހިތްތަކަށް ފިނިކަމާއި އުފާވެރިކަން ގެނުވާ މަންޒަރެއް ކަމުގައެވެ. މައްކާގެ ބިމުގައި މާތް ﷲ ލައްވާފައިވާ މަނާސިކުގެ ކަންކަން ފުރިހަމަ ކުރުމުގެ މަތިވެރި އަޅުކަން އަދާކުރާ މަންޒަރު ކަމުގައެވެ.
އަދި އެކަމުން ދައްކައިދެނީ މުސްލިމުންގެ އެކުވެރިކަމާއި އެއްބައިވަންތަކަން ކަމުގައިވެސް މިއަދުގެ ޚުޡުބާގައި ވިދާޅުވެފައި ވެއެވެ.
