ފިޔުލް ސަޕްލައިސް މޯލްޑިވްސްގެ ބޯޓުތަކުގައި މަސައްކަތްކުރަމުން ގެންދާ ފަޅުވެރިންނަށް ހާއްސަކޮށްގެން ކުރިޔަށް ގެންދަން ހަމަޖެހިފައިވާ "ފަޅުވިލި" ޕްރޮގްރާމް އިފްތިތާހުކޮށްފި އެވެ.
މި ޕްރޮގްރާމްގެ އިފްތިތާހު ކުރުމުގެ އިތުރުން މިނިސްޓްރީ އޮފް ޔޫތް އެންޕަވަރމެންޓް އިންފޮމޭޝަން އެންޑް އާރޓްސްއާއި ގުޅިގެން ހިންގަން ހަމަޖެހިފައިވާ ނެޝަނަލް އެޕްރެންޓިސްޝިޕް ޕްރޮގުރާމްގައި ވެސް އިއްޔެ ވަނީ ސޮއިކޮށްފަ އެވެ.
މި ހަފްލާގައި މިނިސްޓަރ އޮފް ޔޫތް އެންޕަވަރމެންޓް އިންފޮމޭޝަން އެންޑް އާރޓްސް އިބްރާހިމް ވަޙީދު ވިދާޅުވީ މިފަދަ ޕްރޮގުރާމެއް ޒުވާނުން ބާރުވެރިކުރުމަށްޓަކައި ހިންގުމަކީ ވަރަށް މުހިއްމު ކަމެއް ކަމަށާއި މަސައްކަތުގެ އަމަލީ ތަޖުރިބާއާއި އެކު ގައުމީ ފެންވަރުގެ ސަނަދެއް ހާސިލްވުން އެއީ މިފަދަ ޕްރޮގުރާމެއްގެ މައިގަނޑު އެއް މަގުސަދު ކަމަށެވެ.
ފިއުލް ސަޕްލައިސް މޯލްޑިވެސްގެ މެނޭޖިންގ ޑިރެކްޓަރ އިސްމާއިލް ސުހެއިލް ގެ ވާހަކަފުޅުގައި، "ފަޅުވިލި" ޕްރޮގުރާމްގެ ތެރެއިން ކުންފުނީގައި މަސައްކަތްކުރަމުންދާ މުވައްޒަފުންނަކީ ޤާނޫނު ކަނޑައަޅައިފައިވާ މިންގަނޑުގެ ތެރޭން މަސައްކަތުގެ ތަމްރީން ލިބިފައިވާ ބަޔަކަށް ހެދުމަކީ މި ޕްރޮގުރާމް ފެށުމުގެ މައިގަނޑު އެއް މަގުސަދުކަން ފާހަގަކުރި އެވެ. އަދި ނޭޝަނަލް އެޕްރެންޓިސްޝިޕް ޕްރޮގްރާމް ގެ ތެރެއިން މަސައްކަތުގެ މާހައުލަގެ ތަޖުރިބާއާއި އިލްމީ ހުނަރު ތިބި ބައެއް ބިނާކޮށް، ކުންފުންޏައް ބޭނުންވާ ޓެކްނިކަލް ދާއިރާތަކުން މުވައްޒަފުން ތަމްރީނުކޮށް ވަޒީފާގެ މާހައުލަށް ނެރުމުގެ ފުރުސަތު ލިބިގެންދާނެކަން ވެސް ވަނީ ފާހަގަކޮށްފަ އެވެ.
މިއީ މަސައްކަތުގެ މާހައުލުގައި ތިބެގެން އެ މަސައްކަތްތަކުން ތަޖުރިބާކާރުންގެ ބެލުމުގެދަށުން މަސައްކަތްތައް ދަސްކޮށް ތަމްރީނާއި ތަޖުރިބާ ހޯދުމުގެ ފުރުސަތު ގައުމީ ފެންވަރުގައި ހުޅުވާލުމަށްޓަކައި ޔޫތު މިނިސްޓްރީން ހިންގާ ހާއްސަ ޕްރޮގްރާމެކެވެ.
