ގައުމީ އެއާލައިން މޯލްޑިވިއަން އިން މި މަހުގެ ފަހުކޮޅު ފަށާ އަޟްހާ އީދު ޗުއްޓީއަށް އިތުރު 100 އަށް ވުރެ ގިނަ ފްލައިޓް ބާއްވަން ނިންމައިފި އެވެ.
މޯލްޑިވިއަންއިން ބައެއް މީޑިއާތަކަށް މައުލޫމާތު ދެމުން ބުނެފައިވަނީ ބަންދު ދުވަސްތަކުގައި އެތެރޭގެ ދަތުރުތަކަށް އޮތް ޑިމާންޑް ބޮޑުވަމުންދާތީ އިތުރު ފްލައިޓުތަކެއް ބާއްވަން އެ އެއާލައިނުން ނިންމާފައިވާ ކަމަށެވެ.
އެގޮތުން 16 މަންޒިލަކަށް 100 އަށް ވުރެ ގިނަ ފްލައިޓް ބޭއްވުމަށް އެ އެއާލައިނުން ވަނީ ނިންމާފަ އެވެ. އަޟްހާ އީދާއި ފިތުރު އީދާއި ސްކޫލް ބަންދު ދުވަސްތަކުގައި އެތެރޭގެ އުދުހުންތަކަށް އޮތް ޑިމާންޑް ވަނީ ވަރަށް ބޮޑަށް އިތުރުވެފަ އެވެ. ގައުމީ އެއާލައިން އިން ބަންދު ދުވަސްތަކުގައި އިތުރު ފްލައިޓްތައް ބާއްވަނީ ޑިމާންޑް ބޮޑުވުމުން ނެވެ.
މޯލްޑިވިއަންގެ އެތެރޭގެ ފްލީޓްގައި 15 މަތިންދާ ބޯޓު އޮވެއެވެ.
އެތެރޭގެ އުދުހުންތައް އިތުރުކުރަން ނިންމާފައި މިވަނީ އީދުގެ ރަސްމީ ހަރަކާތްތައް ތިން ތަނެއްގައި ބާއްވަން ދިވެހި ސަރުކާރުން ނިންމާފައި ވަނިކޮށެވެ. އެ ރަށްތަކަކީ:
ރ. އުނގޫފާރު
ދ. ކުޑަހުވަދޫ
ގއ.ވިލިނގިލި
އިސްލާމީ ކަލަންޑަރުގައިވާ ގޮތުން އަޟްހާ އީދު ފެށޭނީ ޖޫން މަހުގެ 17 ވާ ހޯމަ ދުވަހު އެވެ. އެހެންކަމުން ދިވެހިންނަށް ނުވަ ދުވަހުގެ ދިގު ޗުއްޓީއެއް، ހައްޖު ދުވަހުގެ ކުރިން އަންނަ ހަފްތާ ބަންދާއެއްކޮށް ލިބޭނެއެވެ.
