އަސްކަރީ އެއްބާރުލުމުގެ ނަމުގައި އެއްވެސް ގައުމެއްގެ ސިފައިން ރާއްޖޭގައި ދާއީމީކޮށް ގާއިމްވެ ތިބެން ދިވެހި ސަރުކާރުން ދެކޮޅުކަމަށް ދިފާއީ ވަޒީރު މުހައްމަދު ގައްސާން މައުމޫން ވިދާޅުވެއްޖެ އެވެ.

މިނިސްޓަރު ގައްސާން މިހެން ވިދާޅުވީ ސިންގަޕޫރުގެ އިންޓަނޭޝަނަލް އިންސްޓިއުޓް ފޯ ސްޓްރެޓެޖިކް ސްޓަޑީސްގެ ފަރާތުން ބޭއްވި "ޝަންގްރިލާ ޑައިލޮގް 2024″ ގައި ވާހަކަ ދައްކަވަމުންނެވެ.

ގައްސާން ވިދާޅުވީ ރައީސް ޑރ. މުހައްމަދު މުއިއްޒުގެ ސިޔާސަތުގައި ދިފާޢީ ގާބިލުކަން އިތުރުކޮށް ރާއްޖޭގެ ވަށައިގެންވާ ކަނޑުގެ ސަރަހައްދުގެ ރައްކާތެރިކަން ކަށަވަރުކުރުމުގައި އިސްކަންދެއްވާ ކަމަށާއި ދިފާއީ ގުޅުންތައް ވަރުގަދަ ކުރި ނަމަވެސް އެއްވެސް މާނައެއްގައި ދިވެހި ބިމުގައި ބޭރުގެ ސިފައިން ގާއިމްވެ ތިބުމަށް ދިވެހި ސަރުކާރުން ބޭނުން ނުވާ ކަމަށެވެ.

"އަޅުގަނޑުމެންގެ ބިމުގައި ދާއިމީ ގޮތެއްގައި ބޭރުގެ އަސްކަރީ ޙާޒިރީއެއް ބޭނުމެއްނުވޭ އަދި ނުވެސްވާނެ. އަޅުގަނޑުމެންގެ އުންމީދަކީ، ރައްޔިތުންގެ މި ޑިމޮކްރެޓިކް ނިންމުމަށް އަޅުގަނޑުމެންގެ އެކުވެރި ޤައުމުތަކުން އިޙްތިރާމް ކުރެއްވުން،" ގައްސާން ވިދާޅުވި އެވެ.

އަމިއްލަ ދިފާއީ ބާރުތަކުގެ ކެޕޭސިޓީ އިތުރުކުރުމަށާއި ދުނިޔެ ޤަބޫލުކުރާ މިންގަނޑުތައް ރާއްޖޭގެ ސަރަހައްދުގައި ކަށަވަރުކުރުމަކީ ރާއްޖެއިން އެންމެ އިސްކަން ދޭ ކަންތައް ކަމަށާއި އެގޮތުން މިހާރުގެ ގުޅުންތައް ދަމަހައްޓައި، އިތުރު ގުޅުތައް ގާއިމް ކުރުމަށް ރައީސް އިސްކަން ދެއްވާކަމަށް މިނިސްޓަރު ވިދާޅުވި އެވެ. އަދި ދިވެހި އަސްކަރިއްޔާގެ ފެންވަރު ރަނގަޅު ކޮށް، ކަނޑުގެ ޓެރަރިޒަމް އަމަލުތަކާއި، ނަހަމަގޮތުގައި ގާނޫނީ ވަސީލަތްތައް ބޭނުންކުރުމާއި، މޫސުމީ ބަދަލުތަކުގެ ސަބަބުން ކުރިމަތިވެދާނެ ނުރައްކާތެރިކަމަކުން ސަލާމަތްވެ، ރައްކާތެރިވުމުގެ ގާބިލުކަން އިތުރު ކުރެއްވުމަށް ވެސް ރައީސް އިސްކަން ދެއްވާކަން މިނިސްޓަރުގެ ވާހަކައިގައި ފާހަގަކުރެއްވި އެވެ.

މީގެއިތުރުން ގައުމުތަކުގެ ސަލާމަތާއި ރައްކާތެރިކަން ކަށަވަރުކުރުމަކީ އަބަދުވެސް ދަތިކަމެއްގެ ގޮތުގައި ސިފަކުރައްވައި މިނިސްޓަރު ވިދާޅުވީ، ރާއްޖެފަދަ ކުދި ގައުމުތަކުން، މިނިވަންކަމުގެ އެންމެ ބޮޑު ޔަގީންކަމެއްގެ ގޮތުގައި ބަލާފައިވަނީ ބައިނަލްއަގުވާމީ ގާނޫނުތައް ކަމަށެވެ. ނަމަވެސް ބައެއް ގައުމުތަކުން އެ އަގު ކުރުންތައް ދޫކޮށްލުމަކީ ކުދި ގައުމުތަކުގެ ރައްކާތެރިކަމާއި ސަލާމަތަށް އޮތް ގޮންޖެހުމެއް ކަމަށް ވިދާޅުވި އެވެ.