ރައްޔިތުންގެ މަޖިލިހުގެ ފޮނަދޫ ދާއިރާގެ އިންތިހާބީ މެމްބަރު އަބްދުއްރަހީމް އަބްދުﷲ އާއި ދިއްގަރު ދާއިރާގެ އިންތިހާބީ މެންްބަރު އަހްމަދު ނާޒިމްގެ ރިޔާސަތު ގައި ރައްޔިތުންގެ މަޖިލީސް ވެގެންދާނީ ދިވެހީންނަށް ނަފާވެރި ކާމިޔާބު މަޖިލީހަކަށް ކަމަށް ނައިބު ރައީސް ހުސެއިން މުހައްމަދު ލަތީފް ރޭ ވިދާޅުވެއްޖެއެވެ.
އަންނަ އަންގާރަ ދުވަހު ފަށާ 20 ވަނަ މަޖިލިހުގެ ރައީސަކަށް އަބްދުއްރަހީމް އަދި ނައިބު ރައީސަކަށް ނާޒިމް ގެންނަން ޕީއެންސީން ވަނީ ނިންމައިފައެވެ. ޕީއެންސީން އެގޮތަށް ނިންމާފައި ވަނީ އެ ޕާޓީގެ ޕީޖީ ގުރޫޕްގެ މެމްބަރުންނާ އެކުގައި މުލިއާގޭގައި ބޭއްވި ބައްދަލު ކުރެއްވުމުގައެވެ.
އެ ނަންތައް ބައްދަލުވުމަށް ހުށަހެޅުއްވީ ރައީސް ޑރ. މުހައްމަދު މުއިއްޒެވެ. އަދި ބައްދަލުވުމުގައި ބައިވެރިވެވަޑައިގެންނެވި މެމްބަރުންގެ އިއްތިފާގުން އެގޮތަށް ފާސްވިއެވެ.
އަބްދުއްރަހީމާއި ނާޒިމަށް ތައުރީފް ކުރައްވައި ނައިބު ރައީސް "އެކްސް" ގައި ކުރެއްވި ޕޯސްޓެއްގައި ވިދާޅުވީ ދެ ބޭފުޅުންގެ ރިޔާސަތު ގައި ރައްޔިތުންގެ މަޖިލީސް ވެގެންދާނީ ދިވެހީންނަށް ނަފާވެރި ކާމިޔާބު މަޖިލީހަކަށް ކަމަށެވެ.
"މަޖިލީހުގެ އާ ދައުރަކީ ދިވެހީންނަށް ނަފާވެރި ކާމިޔާބު ދައުރަކަށް ވެގެންދާނެ ކަމާއިމެދު ޝައްކެއް ނުކުރަން،" މަޖިލިހުގެ ފަރެސްމާތޮޑާ ދާއިރާގެ މެމްބަރުކަން ވެސް ކުރެއްވި މިހާރުގެ ނައިބު ރައީސް ވިދާޅުވިއެވެ.
އަބްދުއްރަހީމް ވަނީ މީގެ ކުރީން ފޮނަދޫ ދާއިރާގެ މެންބަރު ކަމުގެ މަގާމު ދެ ފަހަރެއްގައި ކުރައްވައިފައެވެ. އެއީ 17 ވަނަ މަޖިލިހާއި 18 ވަނަ މަޖިލިހުގައެވެ. ނާޒިމަކީ 17 ވަނަ މަޖިލިހުގައި ދިއްގަރު ދާއިރާގެ މެމްބަރުކަން ކުރެއްވި ބޭފުޅެކެވެ. އޭނާ ވަނީ މަޖިލިހުގެ ނައިބު ރައީސްކަން ވެސް ކުރިން ކުރައްވައިފައެވެ.
މިިދިޔަ އޭޕްރީލް މަހުގެ 21 ވަނަ ދުވަހު އޮތް ރައްޔިތުންގެ މަޖިލީހުގެ އިންތިހާބުގައި ޕީއެންސީން ވަނީ 66 ގޮނޑި ހޯދައިފައެވެ. އަދި ފަހުން އެ ޕާޓީއާ ގުޅިވަޑައިގެންނެވި 8 މެމްބަރުންނާ އެކުގައި އެ ޕާޓީގެ ޖުމްލަ މެމްބަރުންގެ އަދަދު ވަނީ 74 އަށް އަރައިފައެވެ. ޕީއެންސީއާ އެކުގައި މަސައްކަތް ކުރައްވާ އިތުރު ހަތަރު މެމްބަރަކު ވެސް މަޖިލިހަށް ކުރިމަތިލައްވައި އެ ގޮނޑިތައް ކާމިޔާބު ކުރެއްވިއެވެ.
