މޫސުމީ ބަދަލުތަކާމެދު މުޅި މުޖުތަމަޢު ހޭލުންތެރި ކުރުމަށް މަސައްކަތް ކުރުމަކީ ދިވެހި މީޑިއާތަކާއި ނޫސްވެރިންގެ ބޮލުގައި މިއަދު އެޅިފައިވާ ވަރަށް ބޮޑު ޒިންމާއެއްކަމުގައި މޯލްޑިވްސް މީޑިއާ ކައުންސިލް (އެމްއެމްސީ)ގެ ރައީސް އަޙްމަދު މުސްތަފާ މިއަދު ވިދާޅުވެއްޖެއެވެ.
މިއަދު ފާހަގަ ކުރެވެމުންދާ ނޫސްވެރިކަމުގެ މިނިވަންކަމުގެ ދުވަހުގެ މުނާސަބަތުގައި އެމްއެމްސީގެ ރައީސް ދެއްވި ޚިޡާބުގައި ވިދާޅުވީ މި އަހަރުގެ ދުނިޔޭގެ ނޫސްވެރިކަމުގެ ދުވަހަށް ޔުނެސްކޯއިން ކަނޑައަޅާފައިވާ ޝިއާރަކީ
“Journalism in the face of the environmental crisis” ނުވަތަ "ތިމާވެށީގެ ކާރިސާއާ ކުރިމަތިލާއިރު ނޫސްވެރިކަން". ކަމަށާއި، މި ޝިއާރު ބިނާކޮށްފައިވަނީ، މިހާރު މުޅި ދުނިޔެއަށް ކުރިމަތިވަމުންދާ ތިމާވެށީގެ ބޮޑެތި މައްސަލަތަކާމެދު ނޫސްވެރިންނާއި ނޫސްވެރިކަމުގެ ތެރެއިން މައުލޫމާތު ފެތުރުމާއި ހޭލުންތެރިކުރުމުގެ މައްޗަށް ކަަމަށެވެ.
އަދި ޚާއްސަގޮތެއްގައި މި އަހަރަކީ ދުނިޔޭގެ ކަނޑުގެ ލޮނުގަނޑު އާދަޔާޚިލާފަށް ހޫނުވެ، އޭގެ ގެއްލުމާއި ނުރައްކާ މި ކުޑަކުޑަ ދިވެހިރާއްޖެއަށްވެސް ކަންބޮޑުވާ ދަރަޖައަކަށް އޮތް އަހަރެއްކަމުގައި ކަމާގުޅޭ ތަޖުރިބާކާރުން ފާހަގަކޮށްފައިވާކަމަށްވެސް މުސްތަފާ ވިދާޅުވެފައި ވެއެވެ. އެހެންކަމުން މިއަދު ރާއްޖެއަށް ދިމާވެފައިވާ ތިމާވެށީގެ ނުރައްކާތެރި ކާރިސާއާއި، އޭގެ ސަބަބުން ތިމާވެށީގެ ގޮތުންނާއި އިޤްތިޞާދީގޮތުން ކުރިމަތިވެދާނެ ކަންކަމާމެދު، ފުންކޮށް ދިރާސާކޮށް، މޫސުމީ ބަދަލުތަކާމެދު މުޅި މުޖުތަމަޢު ހޭލުންތެރި ކުރުމަށް މަސައްކަތް ކުރުމަކީ ދިވެހި މީޑިއާތަކާއި ނޫސްވެރިންގެ ބޮލުގައި މިއަދު އެޅިފައިވާ ވަރަށް ބޮޑު ޒިންމާއެއްކަމުގައިވެސް އޭނާ ވިދާޅުވިއެވެ.
އޭގެ އިތުރަށް މީޑިއާ ކައުންސިލްގެ ރައީސް ވިދާޅުވީ ނޫސްވެރިކަމުގެ މިނިވަންކަން ދިވެހިރާއްޖޭގެ ޤާނޫނުއަސާސީއިން ކަށަވަރުކޮށްދީފައިވީނަމަވެސް، ނޫސްވެރިންނާއި މީޑިއާތަކަށް އަބަދުވެސް ގިނަގުނަގޮންޖެހުންތައް ކުރިމަތިވަމުންދާކަމަކީ ފެންނަން އޮތް ހަޤީޤަތެއް ކަމުގައެވެ.
އެގޮތުން، ޤާނޫނީގޮތުންނާއި، އެހެނިހެން ގޮތްގޮތުން ދިމާވާ އެކިއެކި ހުރަސްތަކާއި، ނޫސްވެރިންނަށް އަނިޔާކުރުމާއި، ފުރައްސާރަކޮށް އިންޒާރުދިނުންފަދަ ކަންކަން ހުއްޓާލައިގެން މެނުވީ ޑިމޮކްރަސީގެ މި މުހިންމު އަސާސް ޤައުމުގައި ނޯންނާނެކަން އެންމެންވެސް ގަބޫލުކުރަންޖެހޭ ކަމުގައި އެމްއެމްސީގެ ރައީސްގެ ޚިޡާބުގައި ވިދާޅުވެފައިވެއެވެ.
އެގޮތުން ބަވަނަވެފައިވާ މިދުނިޔޭގައި ނޫސްވެރިކަމަށް އިންޤިލާބީ ބަދަލުތަކެއް ވަނީ އައިސްފައިވާކަން ފާހަގަ ކުރައްވަމުން މުސްތަފާ ވިދާޅުވީ، މީސްމީޑިއާ އާއި އާޓިފިޝަލް އިންޓެލިޖެންސްގެ ސަބަބުން ނޫސްވެރިކަމަށް ވަނީ ވަރަށް ބޮޑު ކުރިއެރުމެއް ލިބިފައިވާކަމުގައެވެ.
އެއާއެކުވެސް ސަމާލުކަން ދޭންޖެހޭ އެންމެ ބޮޑު އެއްކަމަކީ ނޫސްވެރިންނާއި މީޑިއާގެ ވަސީލަތްތަކުން ފަތުރާ ޚަބަރާއި މައުލޫމާތަކީ، ނުފޫޒުން އެއްކިބާވެފައިވާ ސައްޙަ ތެދު މައުލޫމާތުކަމުގައި ވުންކަމަށް ވިދާޅުވަމުން މުސްތަފާ ވިދާޅުވީ، ޤަބޫލްކުރަން ޖެހޭ ޙަޤީގަތަކީ ނޫސް އިދާރާތަކުގެ މާލީ މިނިވަންކަން އޮންނަ މިންވަރެއްގެ މައްޗަށް އެމީޑިއާތަކުގެ މިނިވަންކަން ބަރޯސާ ކުރަންޖެހޭ ޙާލަތު ކޮންމެވެސް މިންވަރަކަށް ތަޖްރިބާ ކުރަންޖެހޭކަމެއް ކަމުގައެވެ.
މިކަމަށް ދައުލަތުގެ ހުރިހާ ބާރުތަކަކުން ޚާއްޞަ ނަޒަރިއްޔާތެއް ބެހެއްޓުން މުހިންމުކަމުގައި އޭނާ ވިދާޅުވިއެވެ.
