ޔޫކުރެއިންގައި ހަނގުރާމަ ކުރަމުންދާ ރަޝިޔާސިފައިންނާއި ދެކޮޅަށް އެމެރިކާއިން ސިއްރުން ފޯރުކޮށްދޭ ދުރު ރާސްތާގެ ބެލިސްޓިކް މިސައިލްތައް ޔޫކްރެއިންއިން ބޭނުންކުރަން ފަށާފައިވާކަމަށް އެމެރިކާގެ އޮފިޝަލުން ބުނެފިއެވެ.
އެމެރިކާގެ މީޑިއާތަކުން ބުނެފައިވަނީ މި ހަތިޔާރަކީ އެމެރިކާގެ ރައީސް ޖޯ ބައިޑަން މިދިޔަ މާޗް މަހު ފާސްކުރި 300 މިލިއަން ޑޮލަރުގެ އެހީގެ ޕެކޭޖުގެ ތެރޭގައި ހިމެނޭ ހަތިޔާރުތަކެއް ކަމަށާއި އެ ހަތިޔާރުތައް އައިސްފައިވަނީ މި މަހުގެ ތެރޭގަ އެވެ. އެމެރިކާގެ ނޫސްތަކުން ރިޕޯޓްކޮށްފައިވާ ގޮތުގައި، ހިފާފައިވާ ކްރިމިއާގައި ރަޝިއާގެ އަމާޒުތަކަށް ހަމަލާ ދިނުމަށް މިހާރުވެސް މަދުވެގެން އެއްފަހަރު މި މިސައިލްޔައް ބޭނުންކޮށްފައިވާކަމަށެވެ.
ބައިޑަން މިހާރު ވަނީ ޔޫކްރެއިންއަށް 61 ބިލިއަން ޑޮލަރުގެ އެހީގެ އާ ޕެކޭޖެއްގައި ސޮއިކުރައްވާފައެވެ. އެމެރިކާއިން މީގެ ކުރިން ޔޫކްރޭނަށް އާމީ ޓެކްޓިކަލް މިސައިލް ސިސްޓަމްސް (އޭޓީއޭސީއެމްއެސް)ގެ މިޑް ރޭންޖް ވާޝަނެއް ފޯރުކޮށްދިން ނަމަވެސް، އެމެރިކާގެ އަސްކަރީ ތައްޔާރީތަކަށް ބުރޫއަރާފާނެކަމުގެ ކަންބޮޑުވުންތަކާ ގުޅިގެން، އެއަށްވުރެ ބާރުގަދަ އެއްޗެއް ފޮނުވަން އެމެރިކާއިން ފަސްޖެހިފައި ވެއެވެ.
