ރޭ އަލިފާން ރޯވީ، ބޮލަށް ވެއްޓޭވަރަށް ބާވެފައިވާ، މީހުން ދިރި ނޫޅޭ އިމާރާތެއްގައި ކަމަށާއުމ އެ އިމާރާތް ތަޅާލަން ހަމަޖެހިފައިވާކަމަށް ކައުންސިލްތަކާއި ސިޓީތަކާބެހޭ ވަޒީރު އާދަމް ޝަރީފް ވިދާޅުވެއްޖެއެވެ.
އާދަމް ޝަރީފް ކުރެއްވި އެކްސް ޕޯސްޓެއްގައި ވިދާޅުވީ ރޭ އަލިފާން ރޯވެފައިވަނީ މީހުން ދިރި ނޫޅޭތާ ގިނަ ދުވަސްވެފައިވާ، ބޮލަށް ވެއްޓޭވަރަށް ބާވެފައިވާ ގެއެއްގައި ކަމުގައެވެ. އެގޮތުން މަގުމަތީ ހިގާވެބިގާވެ އުޅޭ މީހުންނަށް ނުރައްކާތެރި ހާދިސާއެއް ކުރިމަތުވެދާނެކަމަށްޓަކާ ސަރުކާރުގެ ކަމާގުޅުންހުރި ފަރާތްތަކާ ވާހަކަ ދައްކައިގެން އެ އިމާރާތް ތަޅާލުމުގެ މަސައްކަތް ވަރަށް އަވަހަށް ކުރިޔަށް ގެންދާނެކަމަށްވެސް އޭނާ ވިދާޅުވެފައި ވެއެވެ.
މި ހާދިސާގައި، އަލިފާން ރޯވި އިމާރާތުގެ ހަތަރުވަނަ ފަންގިފިލާގެ ސަބަބުން ތިންވަނަ ފަންގިފިލައަށް ވަނީ އަލިފާނުގެ އަސަރުކޮށްފައެވެ. މި ހާދިސާގައި އެއްވެސް މީހަކަށް އަނިޔާއެއް ލިބިފައިވާކަމުގެ މައުލޫމާތެއް މިހާތަނަށް ލިބިފައެއް ނުވެއެވެ. އަދި އަލިފާނުގެ ސަބަބުން އިމާރާތަށް ލިބުނު ގެއްލުން ބަލަމުންދާ ކަމަށް އެމްއެންޑީއެފްއިން ވަނީ ބުނެފައެވެ.
މ. ރަބީއުވިލާގައި ރޭ ހިނގި މި އަލިފާނުގެ ހާދިސާއާއި ގުޅިގެން އެ ގެ ހުންނަ މަގު ކަމަށްވާ ކެނެރީ މަގު ދުއްވާ އެއްޗެއްސަށާއި އާންމުނަށް ބަންދުކޮށްފައިވާކަމަށް ފުލުހުން ބުނެފައި ވެއެވެ.
