ޗައިނާއިން ނަގާފައިވާ ލޯނުތައް ދެއްކުން ލަސްކޮށްދޭނެ ކަމުގެ އެއްވެސް މައުލޫމާތެއް ލިބިފައި ނުވާކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފިއެވެ.
ރައްޔިތުންގެ މަޖިލީހުގެ މާލިއްޔަތު ކޮމެޓީގައި ރައްޔިތުންގެ މަޖިލީހުގެ މެންބަރުން ކުރެއްވި ސުވާލުތަކަށް ޖަވާބު ދެއްވަމުން އެމްއެމްއޭގެ ޑެޕިއުޓީ ގަވަރުނަރު އިމާދު އަހުމަދު ވިދާޅުވީ އެފަދަ އެއްވެސް މައުލޫމާތެއް އެމްއެމްއޭއަށް އަދި ލިބިފައި ނުވާ ކަމަށެވެ. "ޗައިނާގެ ލޯނުތައް ރީސްޓްރަކްޗާ ކުރުމާ ގުޅޭ ރަސްމީ އެއްވެސް މައުލޫމާތެއް އަދި ނުލިބޭ،" އިމާދު ވިދާޅުވި އެވެ.
ޗައިނާއަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު ޖެނުއަރީ މަހުގެ 13 ވަނަ ދުވަހު ރާއްޖެ ވަޑައިގެންނެވި ރައީސް ޑރ.މުހައްމަދު މުއިއްޒު ވެލާނާ އިންޓަނޭޝަނަލް އެއާޕޯޓުގެ ވީއައިޕީ ލައުންޖުގައި ނޫސްވެރިންނަށް މައުލޫމާތު ދެއްވަމުން ވިދާޅުވީ ޗައިނާގެ ލޯނުތައް ދެއްކުމުގައި ލުއި ގޮތްތަކެއް ހަމަޖެއްސުމަށް އެގައުމުން ނިންމާފައިވާ ކަމަށެވެ. އަދި ޗައިނާއިން ނަގާފައިވާ ލޯނުތައް ދެއްކުމަށް މިހާރު އޮތް ޕްލޭން ނުވަތަ ޝެޑިއުލަށް ލުޔެއް ދިނުމާ ބެހޭ ގޮތުން ދެ ގައުމުން އެންމެ މަތީ ފެންވަރުގައި މަޝްވަރާ ކޮށްފައިވާ ކަމަށް އޭނާ ވިދާޅުވި އެވެ.
"އަޅުގަނޑު ޗައިނާގެ ރައީސަށް މިކަން ހުށަހެޅުއްވުމުން، ރަސްމީ މަޝްވަރާތަކުގައި ވަގުތުން ކަމާ ބެހޭ އޮފިޝަލުންނަށް އެކަން އަންގަވައި، ކުރިއަށް އޮތް ފަސް އަހަރަށް ޗައިނާއަށް ދައްކަން ޖެހޭ ލޯނުތައް ދެއްކުމަށް ޓެކްނިކަލް ޓީމެއް ވަރަށް އަވަހަށް ރާއްޖެ ފޮނުވުމަށް އެދިވަޑައިގެންނެވި،" ރައީސް ވިދާޅުވި އެވެ.
ރައީސް ވިދާޅުވީ ވަރަށް އަވަހަށް ފައިނޭންސް ޓީމެއް ފޮނުވައިގެން ދިރާސާކޮށް ފަސް އަހަރުގެ ތެރޭގައި ވީހާވެސް ފަސޭހައިން ލޯނުތައް ދެއްކޭނެ ގޮތެއް ނިންމާނެ ކަމަށެވެ. އަދި އެކަން މިހާރު ހައްލުކުރެވިފައިވާ ކަމަށާއި އެކަމުގެ ސަބަބުން ލޯނުތައް ދެއްކުމުގައި ވަރަށް ބޮޑު ލުޔެއް ލިބިގެންދާނެ ކަމަށް ރައީސް ވިދާޅުވި އެވެ.
